страница1/3
Дата20.01.2019
Размер0.77 Mb.

69 ар ортчиз ке яке Кызьы Лёва, Марьёк но мукетъёс Йыр-визь дуннее вуылӥзы


  1   2   3

69 ар ортчиз ке...

яке Кызьы Лёва, Марьёк но мукетъёс Йыр-визь дуннее вуылӥзы

повесть-фэнтези

Кыкетӥ арнязэ ни Яр ёросысь нюлэс шорын, вӧл-вӧл кыралын, ужа нылпиослы лагерь. Отын шутэтско быдэс дуннеысь удмурт пиналъёс: тужгес визьмоосыз, тужгес быгатӥсьёсыз, тужгес-тужгесъёсыз. Вакчияк вераса, калыклэн осконэз.

«Шудкар» лагере нуэ огшоры читыр-чутыр сюрес. Тодӥсьтэмез ӧй но малпасал, со кузя мыныса, нылпиос доры вуод шуыса… Туж шерез гинэ ас понназ тунсыкъяськиз: нош малы пиналъёслы лагерез пыдлось нюлэскы усьтӥзы? Собере ачиз ик валэктылӥз: чылкыт омырен шоканы, вылды. Зэм, пиналъёслэн йыразы сыӵе малпанъёс ӧз бергалэ. Соослэн йыразы вал воксё мукетыз…
* * *

Туннэ ӵукна удалтӥз. Пурысь ӝук но вӧйын-нянь сяна, йогурт сётъязы. Сиськемзы бере лӧпшам пиналъёс кин кытчы пазьгиськизы. Журналистика отрядысь пиос соку ик видеокамера кутӥзы, возь вылысь турын-куар пӧлы дыртӥзы, кырӟасьёслэн отрядзы сцена вылэ тубиз, театралъёс актовой залэ мынӥзы, суредасьёс кызьпуос улэ интыяськизы, программистъёс - ӟусъёс вылэ, гожъяськисьёс… Гожъяськисьёс корпусазы кылизы. Соос азьын туж секыт ужпум: “Шудкар” сярысь гимн кылдытоно. Соин ик кылбурасьёс ӟабыль потто. Манилы, пичи мугорысьтыз-а мар-а отӥгес карыса, кыл сётӥсь ӧвӧл. Нылаш висказы пырыны выриз ик:

- Ойдолэ ваньмы нимаз гожтом, собере тужгес устозэ быръём.

Но Марьёкез кылэм-марам ӧз каре. Горд йырсио Италмас гинэ меӵкытӥз:

- Ми татын огъя кариськыса, кузьылиос сямен ужаськом. Тынад висъяськемед ке потэ, мын, эн люкеты!

Сыӵе кылъёслы пумит Мани ма вазьыны ик паймиз, пукиз-пукиз но шыпытак гинэ кыре потӥз. Яркыт шунды сокем мальдытӥз сое, огдырлы нылашлэн йырыз ик поромиз. Ого-пало мылкыдын Марьёк котырзэ чаклаз но буш скамьяос доры дыртӥз. Вот татын со ачиз, огназ гимн гожтоз. Адӟозы ай, кыӵе ӟеч кылъёс, рифмаос шедьтыны быгатоз Мани Широбокова! «Шудкар» - шудэн пачылась кар луыны кулэ. Нош соос, эх… Нылаш блокнотсэ усьтӥз...

- Ну тон, пиксель! - тодмо куараез кылыса Манилэн пичи сюлэмыз шуак быдэс гадьзэ тырмытӥз кадь, - учкы кызьы сое лэсьтоно...

Нылаш берытскиз. Палэнысь, улмопуос вискысь скамья вылэ программистъёс отрядысь пиос интыяськиллям. Одӥгезлэн кияз планшет кутэмын, маке споръясько.

- Учкы, та программаез татысь басьтоно, собере тани тазьы, - токоль-токоль бамо, бадӟым очкио пияш планшет кузя чиньыеныз сопала-тапала нуллэ, вуэм сезьы йырсио Генялы маке валэктэ. Бен, таизлэсь пияшлэсь нимзэ Марьёк нырысь нуналысен ик тодэ. Угось ӝужыт, лач-лач мугоро, чылкыт тусо пияшлы соку ик синмаськиз, солы сӥзьыса одӥг кылбур но гожтӥз ни. Эшшо гожтоз. Мани син ултӥз гинэ чаклаз Геняез, мусо пальыштӥз. Но эшъёс сое адӟем но ӧз каре, куспазы, киосынызы шонаса ик, вераськизы. Кӧтыз ӝожен нылашлэн ымдуръёсыз пеперскизы. Со блокнотысьтыз йылпумъямтэ кылбурез шоры учкиз:

Мон тонэ сокем зол яратӥ,

Анайме-атайме вунэтӥ,

Эшъёсы но ӧвӧл ни кулэ,

Выйисько яратон зарезе...

Выйисько яратон зарезе, - ас понназ шыпыртӥз нылаш, - зарезе... Но кылбурзэ нокызьы азинтыны ӧз быгаты, пельёсыз сак кылзӥзы пиослэсь валантэм вераськонзэс.

- Собере К 13 кароно, валад-а? Тани адӟод ай, асьмелэн шудон программамы вань калыкез паймытоз! Суперинтеллектуальной, суперудмуртской, супер-пуперской шуозы! – питыр-котыр пияш ныр йылысьтыз ньыль сэрего очкизэ тупатӥз но юлтошез шоры данъяськон мылкыдын учкиз.

- Зол! – сыӵе ик бурдъяськыса вазиз Геня, - Ним но солы сыӵе ик пуперской сётоно. Эксэйёслэн кадь.

- О-о, туала-вашкала тусо, - усись очкизэ чиньыеныз интыяз пуктӥз эшез.

- Оло, «Зэрпаллэн вужераз»? Чебер кылӥське кадь… - йырберзэ кормаз Геня.

- Чебер… но маке сыӵеез вал ни ук.

- О-о, книга-а мар-а… Соку, соку… «Кылдысин дауре» яке «Алангасар кар»… Кинъёс отын вань на…

- Инмар, Куазь, Кылдысин, - чиньыоссэ ӝог куасалляны ӧдъяз питыри пиёк…

Со вискын корпусысь тэтчаса но ӵаш карыса, потӥзы театралъёс: “Одӥг-кык-куинь, ымдэ усьты, синдэ кынь...” Пияшъёслэн вераськонзы ӵашетэм пӧлы ышиз. Театралъёс ӟольгыриос сямен ӟильгетыса Мани вӧзтӥ ортчизы, нош тужгес акылесэз - Лёва Петров – нылашлэсь йырси пунэтсэ кыскыны вуттӥз на:

- Эй, писатель, - кырмыштӥз йӧнтэм пияш но эшъёсыз сьӧры лобатӥз.

- Синазькыль Лёвонтей, - йырысьтыз ӵуж лентазэ тупатыса, нукыртӥз Мани. Угось та пияшлэсь со воксё акляк луиз ни: Лёвалэн ноку дортӥз гань-гань ортчемез уг луы, я йырсизэ кыскоз, я маке пышкылоз, я ручказэ кайпалтоз...

Майбыр со артистъёслы, - лагере лыктэм дырысеныз нырысьсэ малпаз нылаш. - Вот поэтъёс, писательёс ӟеч произведение гожтон понна кема-кема малпаськыса пуко, нош таос со гожтэмез возьмато но утыр ик данэ пото. Мани лулӟиз. Нош мон гожто тани сыӵе кылбур, сыӵе гимн, ваньмызлы со сыӵе яралоз, ваньзы сыӵе паймозы, киоссэс ӵош кутыса кырӟалозы, чеберезлы синмаськыса синвуаськозы, вот соку, соку... Соку Геня синйылтоз монэ, адӟоз: мон пичи ке но – туж быгатӥсь и… и мон сое яратӥсько...

Мани пияшъёс-программистъёс пала берытскиз. Улмопуос улэ ватӥськем скамьяын – буш. Ку гинэ кошкыса вуттӥллям, - ӝожомиз Марьёк но, мур лулӟыса, нош ик блокнот пушказ пыриз.


* * *

Нуназе бере “Шудкарын” пиналъёс ялкаро. Кӧлыны мылкыд карисьёс ӧвӧл, соин ик корпусъёсазы кыл быдтыса пуко, кин ке телефоназ бугыръяське, кин ке лыдӟиське. Вожатойёс асьсэ висъетазы шутэтско. Нокин нокинлы уг люкеты. Лагерьын аспӧртэм шыпытлык кузёяське.

Но таяз рад омырын шӧдӥськиз кыӵе ке валантэм мылкыд: мар ке сыӵеез луыны кулэ кадь. Марьёк кияз бергатӥз Онтон Офигенновлэсь кылбур бичетсэ, нош йыраз гужлазы аслаз чуръёсыз:

Эшъёсы но ӧвӧл ни кулэ,

Выйисько яратон зарезе...

Ӟукыр-таш! вазиз ӧс. Шок-пуль пыриз ваньзэ тодӥсь чеберай - Италмас:

- Нылъёс! Программистъёслэн отрядысьтызы кык пияш пегӟем!

- Кызьы пегӟем? Кытчы?

- Ӧйтӧд, - секыт йырси пунэтъёсыныз сэзъяз Итӥ, - Но мон кузёлэсь кесяськемзэ кылӥ. Али ик, пе, шедьтэ пиосты! Малы лагерьысь асьсэ мылкыдзыя потӥзы?! Сыӵе кесяськиз, ой-ёй-ёй!

- Йӧтоз табере шкыламъёслы,- валес вылысьтыз дыртытэк ӝутскиз векчи мугоро Наталь. - Жингыртоно вал пиослы, верано...

- Ха, вожатойёс жингыръяллям ни, телефонъёссы, пе, кысэмын!

- Нош кин пегӟем? - нокыӵе ик ӧз кариськы кадь Наталь.

- Ноку ӧд тодысалды – Геня Москвин но Ондӥ, кызьы ай сое… Ма, ялан ӵош ветло…

- Никитин-а мар-а? – паймеменыз, кузялэс ымнырыз эшшо кузяз кадь Натальлэн.

- Бен, бен, Ондӥ Никитин! – шумпотӥз Италмас.

- Вӧтам но ӧй малпасал, - синъёсыз задор ӝуалскизы Натальлэн, - Озьыен, зэмос побег!

- Побег не побег, - буй-буй горд йырсизэ тупатыса, валес вылаз ланьырскиз Италмас, - Но лагерьысь соосты табере уллялозы...

Марьёк малы ке соку ик ӝожомиз. Сыӵе визьмо пиосты – уллялозы? Со дӥсьтытэк гинэ вазиз:

- Оло... соосты лушказы? Кин ке йыртэмасьёс. Табере уксё курозы, вукуп...

- Ха-ха-ха, - Итӥ валес вылаз погыльскиз, - Лушкалозы, пе, ха-ха-ха, сыӵе ослопъёсты. Тани тонэ кисыязы поныса лушкасалзы ке, соку валамон.

Марьёклэн аслаз но серемез потӥз.

- Тын-тан! Тын-тан! - лагерь тыр шуккиськиз тангырае йыггетэм. - Ваньзы – ӧтчаме! Нылпиос ури-бери люкаськизы стадионэ. Лагерьлэн кивалтӥсез Ёрги Петрович мултэс вераськыса ӧз улы, соку ик вазиськиз:

- Пиналъёс, асьмеос нырысь нуналаз вераським: лагерь сьӧры потаны уг яра! Нырысь интыын — дисциплина! Кинлы ке кытчы ке туж кулэ ке, вазиськоно вожатойёслы. Но та куронъёсты тӥясьёс шедизы. Кин тодэ, кытчы кошкизы программистъёслэн отрядысьтызы Геннадий Москвин но Андрей Никитин? Оло, кин ке вераськемзэс кылӥз?

Но пиналъёс ма шуыны паймыса сылӥзы. Ӵукна выль программазы бордын ужаса, пе, ветлӥзы, ӝытазе презентация ортчытыны дасясько вал.

- Кин ке мае ке тодаз ваиз ке, вералэ вожатойёслы яке меӵак мыным, - оскись синъёсын нылпиосты котыртӥз на Ёрги Петрович.

Но ӝытозь номыр тодмо ӧз луы. Паймымон вал соиз но: лагерь котыре пуктылэн видеокамераос пиослэсь кошкемзэс адӟиллямтэ. Пиналъёслэн кӧлон азязы вуиз ини полиция. Ваньзылэсь юалляськемзы бере тодмо луиз: пиосты берлозэ Марьёк адӟем. Ӵапак улмопуос дорысь скамья вылысь. Паймымон: кытчы пыризы ӝужыт кенерен котыртэм интыысь нылпиос, малы соосты возьмаськисьёс, ма, асьсэос пиналъёс но ӧз адӟе?

Полицейскойёс кошкизы. Лагерьын шыпыт луиз. Ёрги Петрович ӝыт дискотекаез ортчытыны ӧз лэзьы. Ваньзы ӝожмыт тусын ветлӥзы. Куспазы вераськизы но кадь шыпытгес, ӵемысь шыпыртыса.

- Ма, соос шузиос ӧвӧл ук, номыр ӧй ке луысал, вуысалзы ни, - умме усьыны кематэк ӧз вормы Марьёк. Ӧз кӧлэ, лэся, эшъёсыз но...


* * *

- Чаль ай татчы, вераськон вань, - Лёва ӵукна ик Марьёкез кыре кыскиз. - Кытысь, шуиськод, соосты берлозэ адӟид?

- Тӥни отысь, улмопуос дорысь. Скамья вылын пуко вал, - тӧрнам синъёссэ зыраса вазиз нылаш. - Мар бон?

- Ойдо, возьматы...

- Отын, кыдёкысяз пуко вал, - чиньыеныз азьлань возьматыса, Марьёк ӵем-ӵем вамышъяз сюбег сюрес кузя.

- Тани, - нылаш улмопулэсь вайёссэ палэнтыса, скамья вылэ интыяськиз. - Татын пукизы.

- Хм, паймисько, - пельпумъёссэ ӝутъяз Лёва. - Соослэсь татысь кошкемзэс одно ик адӟись луыны кулэ вал, кенеръёс дорозь кыдёкын, ваньмыз син азьын.

- Мон но озьы малпасько, - шыпыртӥз Марьёк. - Тапалтӥ соку сомында калык бызьылӥз, но кошкемзэс нокин адӟымтэ...

Лёва огдырлы ассэ зэмос сыщикен шӧдыны кутскиз.

- Кылзы ай, Мани, - скамья вылысь лондылэм буёлэз сак чаклаз пияш, - мон но соосты ӧй адӟы ук, тапалтӥ, тон дортӥ ортчи ке но, а? Оло, тон мае ке сураськод? Оло, соос чик но татын ӧз пуке?

Марьёклэн ымнырыз улмо выллем ӵыжектӥз:

- Пукизы! Ас синъёсыным адӟи! Эшшо маке выль программа, пиксельёс сярысь вераськизы, эшшо, ним утчазы, «Кылдысин дауре», «Алангасар кар»…

Лёва улмопуэз котыр ласянь эскериз но вай вылэ кечырскыса, емышсэ ишкалтӥз. Куртчиз. Фу, чырс... Марьёклэсь верамзэ со ӧз кылы ни, шӧдске. Нош нылаш тодаз вайыны тыршыса, лабыртӥз:

- Собере эшшо маке шуизы... Инмар, Куазь, Кылдысин...

- Мар? - палэс яблоксэ ӝужыт турын пӧлы сэрпалтӥз Лёва, - Кылдэ си, шуиськод? Озьы умойтэм, удмуртъёс кылдэ нюлод шуо. Туж ческыт, озьыен. Но татын ческыт ӧвӧл, чырс...

Лёва буш скамья шоры долказ.

- Марьёк, тон кытын?

Клоп! Сэзъяськись вайысь улмо пияшлэн пыд азяз усиз. Лёва усьтыр-табыр котырзэ чаклаз – нокин ӧвӧл.

- Марьёк, кытчы ышид? Пот чаляк!

Но нылаш ӧз вазьы. Лёвалэн йырсиосыз син куспын пежыр ӝутӥськизы. Турын вискысь чиныр-чоныр сюрес кузя со корпусэ лобатӥз. Пияшлы туж возьыт, но огназ со интые кыльыны кышкыт. Кытӥ-мартӥ Мани кошкыса вуттӥз? Ну ки улаз шедиз ке, йырси пунэтсэ кыскалоз!

Но сиськыкузы Лёва Марьёкез ӧз синйылты. Собере кулэ вал репетициос кутскыны. Но... Ӝоген Лёваез быдэс лагерь котыртӥз.

- Тон ӵукна Марьёкен кытчы ветлӥд? Кытчы со ышиз?

- Ышиз?! - Лёвалэн ымнырыз кӧсэктӥз. - Ма, кызьы? Ма, со возьматӥз гинэ. Со возьматӥз гинэ кытын.... пиос пукизы, возьматӥз гинэ... Ышиз?!

Та нуналэ лагерьын нокыӵе репетициос но, занятиос но ӧй вал ни. Ваньзэс шобыртӥз адскисьтэм но юзырес кышкан. Пиналъёс парен-парен яке воксё уллёен-уллёен гинэ ветлӥзы на. Бадӟым сюлмаськон шӧдӥськиз вожатойёслэн тусъёсазы но. Нош Ёрги Петрович, зангари тусо жигулие пуксьыса, ӝогак кытчы ке ширтӥз.


* * *

Марьёкез ӧз шедьтэ. Пиосты но. Тросэз анай-атайёс пиналъёссэс доразы басьтыны дыртӥзы. Лагерьлэн кивалтӥсьёсыз ужлэсь палэнтэмын вал, вераськон мынӥз быдэс лагерез ворсан сярысь. Ӝыт Лёва доры но атаез вуиз. Пияш бертыны пумит вал, но атаеныз мултэс уд вераськы.

- Юнме-а мар-а мон бензин быдтыса сокемысь лыктӥ, - лекъяськиз атаез, - Уг валаськы, малы анаед тонэ сокеме – Пичи Пурга кемысь Яре – келяз. Вал ук мукет лагерьёс но! Ойдо, пӧрмытскы.

Лёва номыр ӧз вазьы. Вазиз ке но, атаез валалоз шат? «Шудкар» лагере соос туж бадӟым конкурсъя шедизы. Кулэ вал ӟеч тодыны удмурт кылэз, удмурт калыклэсь сямъёссэ, культуразэ. Но Лёвалэн атаез понна ваньмыз со мултэс. Вуоно пиосмурт коньдон поттыны, пе, кулэ. Соин ик Лёвалэсь артист луон мылкыдзэ но со уг вала. Собере атай дышемын ваньзэ ачизъя лэсьтыны, солэн ваньмыз тӧдьы яке сьӧд. Бен, Лёва пичи дыръя атаез соин туж ӵем шудылӥз, туп ӵыжалляз, куасэн бызьылӥз. Нош али – ялан ужа, жадьыса бертэ, вераськыны дырыз ик ӧвӧл.

Вольыт асфальт вылтӥ машина шур! кошке. Лёва син пумтӥз гинэ учкиз атаез шоры. Ворогорон бадӟым киосыныныз рулез тач-тач кутэм, ымныраз лек тус пуксемын. Но пияш ымзэ усьтыны дӥсьтӥз ик:

- Атай, кызьы малпаськод, соосты шедьтозы-а?

- Шедьтозы. Шедьтозы но берпалзэс пушнерен сачкетозы, - лек вазиз атаез. – Сыӵе аресказ адями эсэпсэ валаны кулэ ни. Ӧжытгес лэся ньӧрен визьмаллям эшъёстэ!

Лёвалэн нырысьсэ атаезлы куаш-куаш мытылэмез потӥз. Пияш йырзэ ошпи кадь лэзьыса, вазиз:

- Соос – эсэпсэ валасьёс. Дышетско но умой вал, вань занятиосы ветлӥзы, активистъёс...

- Соин вожатойёссэс, анай-атайёссэс, быдэс лагерез шузимытыса, нуназе куазен пегӟизы?! Ай эшшо ке нылашез сьӧразы басьтӥллям! Уг валаськы: кытчы учкиз лагерьлэн администрациез?

Лёвалэн пумит верамез потэ на вал, но кылъёсыз ньылоназ ӟырдам узвесен кугӟазы. Марьёк ышем понна мон янгыш, янгыш... - бергаз пияшлэн йыраз. Но шара со номыр ӧз вера.

- Так, кылзы монэ, - малпанъёссэ куспетӥ кариз атаез, - Мон но, анаед но али шузимыса ужаськом, тонэ чакласа улыны дыр ӧвӧл. Дорын тыныд али немар карыны, мынод песятаед доры, Улягуртэ.

- Улягуртэ? - паймиз Лёва.

- Кылзы, кыл вискы эн пыры! – керӟег ӵогиз воргорон, - Улягурт интыяськемын Глаз ёросын. Туж пичи гурт. Отын улэ песятаймылэн агаез – Онтипагай. Солы 90 аресъёс ни. Кылле со гуртаз, нокытчы кошкемез уг поты. Вот отын кык арня пала улод, солы юрттӥськод, гурт ужез коть валалод.

- Нош телефон кутэ-а? Интернет? - атаез шоры сак учкиз Лёва.

- Малы тыныд интернет? Бакча ужез ужа, котырзэ тупатъя! - пиез шоры лек учкиз атай. - Сое воксё чаклась ӧвӧл, песятаед луло дыръяз коть вуылэ вал. Ми анаеныд ужаса ум пӧрмиське, нош тон лагерьёстӥ тӧл ӵыжаса ветлӥськод! Всё!

Лёвалэн Онтипагайзы сярысь кылылэмез вал, нош адӟыны огпол но ӧз кылдылы. Валамон, пересь сокем пересь ини, соос доры ӧз вуылы. Нош асьсэос Лёваос ялан уг ваньмо. Атаез, лэсьтӥськон удысын ужась, Ижысь патерзы понна кредит тыре, шутэтскон нуналъёсы но уг ваньмылы.

Лёва мур лулӟиз. Вот тыныд гужем шутэтскон. Мар со туала вакытэ 14 аресъем пияшлы куштӥськем гуртысь мырдэм векась пересь вӧзын улон. Эшъёсыдлы верад ке, серем карозы. Интернет гинэ но ӧвӧл!

Глазкарысь лавкае пыраса, соос кӧня ке кеньыр-макарон, куинь колды нянь но сӥльтырем басьтӥзы. Город пыр потыса, ширтӥзы шунды ӝужан пала. Куазь ӝомо-югдо. Яркыт вирен кадь наштаськем шунды берзэ учкыса пуксе. Сюрес пумен-пумен сюбегаз, машинаос одӥг-кык гинэ адӟисько на. Тани атаез из сюрес вылэ кожиз, машина дамбыр-йыг тэтчаны ӧдъяз.

Улягуртын ог вить корка. Улӥсез – куинь. Кыкез – гурт романтикаез утчась кузпалъёс. Куинетӥез - Онтипагай. Лёва син азяз пуктэ вал музъемозь губырскем пересез, но тып-тып пу коркась потӥз кочон кадь мугоро, тӧдьы тушо дядяй.

- Ӟечбур, - шуныт пальыштыса, учкиз со кунэрес Лёва шоры. - Озьыен, асьмеос ӵош улом.

- Ыхы, - нукыртӥз Лёва.

- Ойдо, пыртаськы, - басьтэм сиёнъёсын пакетъёсты пиезлы мычиз атаез. Собере Онтипагайлы вазиз:

- Я, мон кошки. Ассэ умой мед возёз. Ужаты сое. Жингыртом собере.

Лёвалэн атаез машинае пуксиз но син азьысь утыр ик ышиз. Бӧрсяз лёгам турын но унябейёс гинэ кылизы.

- Э-ке-ке, кӧлыса коть кошкы вал, - ӧпкелиз пересь, - Вань ужез ужаса быдтод шат? Кытчы сокем дыртонэз ни уйлы пумит...


* * *

Пичигес пу коркан туж эркын вылэм. Кана, ӝӧк, гур, валес. Лёвалы тужгес яраз сэндра. Таӵезэ солэн ноку адӟемез ӧй вал на. Онтипагайлэн турынъёсын парем чаез, гурын пыжем картошкаез неномыртэм ческыт потӥзы. Нош гурт вӧзын ик шур, пе, вань, отын суй быдӟа чорыгъёсыз. Озьыен, ӵуказе визнаны мынозы. Но кӧлыны выдэм бераз пияшлэн йыраз нош ик берганы ӧдъяз лагерьысь югдур, Марьёклэн ышемез. Лёва малпаськиз: Марьёк огназ кытчы ке пегӟыны уг быгаты вал. Нылашез одно синйылтысалзы. Собере, малы солы пегӟонэз? Кинлэсь? Со ышиз ӵапак со интыын, скамья вылын пукыкуз. Муртъёс нуысалзы ке, одно ик кин ке адӟысал. Оло, кыӵе ке мукет кужымъёс... - пияшлэн син азяз кӧшкемыт фильмъёсысь вазерпиньёсын, кузь лусьтро йырсиосын ведӥнъёс пуксизы, - Пияш пичи гинэ ӧз черетскы, шобрет улэ ватӥськиз.

Выж пуос ӟукрак каризы. Лёва шобрет улысен чакласькиз. Ӝӧк котыртӥ, кияз фонарикен, Онтипагай ветлэ. Пияшлы ваньмыз та выжыкылын кадь потыны ӧдъяз. Бен, бен, ваньмыз – выжыкыл: пу корка, пу ӟусъёс, сэндра, фонарик-сюсьтыл но кузь тушо пересь тани-тани ышозы. Лёва сайкалоз, синъёссэ усьтоз но адӟоз – лагерьысь корт валес вылаз кылле. Пияш ымдурзэ куртчиз – уг, уг кӧлы. Со вискын пересь маке утчаськиз, ӝажы вылысь газет шедьтыса, лачмытак гинэ валес вылаз пуксиз. Лыдӟиськыны кутскиз.

“Удмурт шаер” - сэндра вылысен тодмо газетэз адӟыса, паймиз Лёва. Та дунне пыдэсын улӥсь песятаез эшшо ке газет басьтэ на, лыдӟиське...

- Малы, шуиськод, лагерьды ворсаськиз? - шӧдтэк-шорысь юаз дедушез. Куалектэменыз Лёва ма вераны ик ӧз вала.

- Ма, марым... Пиналъёс кытчы ке ышизы, яке пегӟизы... Соин ворсазы.

- Ышизы, шуиськод? - сэндра пала йырзэ ӝутӥз пересь. Куинь мурт – кык пи но ныл, озьы-а?

- О-озьы… - кылыз быгыльмиз Лёвалэн. – Кытысь тодӥськод?

- Газетысь, - вазиз пересь, - Тани туннэ выль номерзэ басьтӥ, нырысетӥ бамаз ик гожтӥллям... - пересь лулӟиз, газетсэ палэнтӥз но малпаськись тусо луиз. Сэндраысь васькем Лёва нош газетысь пичи ивор шоры мертчиз.

.....15 июле нылпиослэн арлы быдэ радъяськись “Шудкар” лагерьысьтызы куинь пинал ышиз: 14 аресъем Геня Москвин но Ондӥ Никитин, 13 аресъем Мария Николаева...

Лёвалэн быдэс мугорыз тылэ пырем кадь ӝуаны ӧдъяз.

- Песятай, та мынам лагере, та мынам... эшъёсы.

- Ойдо, пуксьы, - шораз мур синъёсын учкиз Онтипагай, - Мадь мыным ваньзэ.

Лёва пушказ тэрисьтэм вань сюлмаськонъёссэ, ассэ янгышен шӧдэмзэ, песятаезлы вераз. Онтипагай шып кылзӥз. Собере султӥз, корка кузя сопала-тапала вамышъяз но берен нунокез вӧзы пуксиз.

- Пие, тон астэ янгыш эн кары, татын сыӵе ужпум... Со усьтӥськиз... Со усьтӥськиз ӵапак тӥляд лагеряды, отын...

Лёва песятаез шоры сак учкиз. Мар ай со сыӵе йӧнтэм вераське?

- Тон уд валаськы, пие, адӟисько, уд валаськы... - Песятай ӝожомыса, тушсэ маялляз. - Я, иське, ваньзэ радызъя... Удмуртъёс куке но туж кужмо бадӟым калык вал. Улӥзы нюлэсъёсын, пӧйшуразы, чорыгазы, вуз каризы пӧрэм калыкъёсын. Удмуртъёс туж умой улӥзы. Инкуазез утизы, солы вӧсяськизы, нокинэ ӧз обиде...

- Песятай, мон ваньзэ тае тодӥсько, - керӟегъяськыны ӧдъяз Лёва. - Дышетӥсьмы дас пол вералляз ни. Тон валэкты: мар отын усьтӥськиз?

- Нош удмуртъёслэн Быдӟым книгазы сярысь тодӥськод-а? - нокыӵе ик ӧз кариськы пересь.

- Энциклопедия сярысь? Тодӥсько, конечно - “Удмурт Элькун” нимаське.

- Ӧвӧл, пие. Вашкала дыръя удмуртъёслэн вылэм Быдӟым книгазы. Отын вань визькылъёс гожъямын вал. Со книгаез туж утьыса возиллям. Но кыӵе ке вакыт чакласа вуттӥллямтэ, горд ош лыктэм но...

- Но сием, - куспетӥ карыны дыртӥз пияш, - Та выжыкылэз но мон тодӥсько.

- Ӧвӧл, пие, выжыкыл ӧвӧл со. Зэмзэ но озьы вал.

- Песятай, ма, мон пичи ӧвӧл ни. Со быдӟым книга сыӵе дуно вал ке, малы сое ошлэн ныр улаз кельтӥзы? Отын быдэс калыклэн визьмыз люкамын ке, ватоно вал сандык пыдсы, мур-мур. Сомында удмуртъёс одӥг визьмо книгазэс утьыны ӧз быгатэ!

- Э, пие, пие... Адямиос малпало, книгаез ош ньылӥз. Нош зэмзэ ке, книга нокытчы ӧз ышы. Со вань али но. Сое туж юн утьыса возё, котькинлы учкыны кылдымтэ.

- Номырзэ уг валаськы, песятай, соку мае ош ньылэм?

- Ну, горд ош – со тылпу шуэмез возьматэ. Кылысь кылэ, пельысь пеле ветлӥсь мадёсъёсын лек тылпуэз горд ошен ӵошатӥзы. Удмуртъёслэсь книгазэс кӧшкемыт тылпу быдтыны кулэ вал. Но шуисько ук, книга утиськиз. Сое адӟыны туж но туж шерезлы кылдэ. Оло, нокинлы уз но кылды ни. Соин ик, удмуртъёс зэмлыкез ноку медаз тодэ шуыса, малпамын вал сыӵе выжыкыл. Ну, сиемын но сиемын книга, улом ни табере огсыр, номыр сярысь малпаськытэк...

- Нош тон кытысь ваньзэ тодӥськод? - Лёва кескич учкиз песятаез шоры.

- Тодӥсько, пие, оскы мыным. Удмуртъёслэн вашкала книгазы зэмзэ но вань. Со улэ Йыр-визь дуннеын. Огшоры адями отчы сюрыны уг быгаты. Отчы шедьыны луэ музъем вылысь куд-ог интыосысен гинэ. Котькуд 69 арлы одӥг пол музъем вылын ошмес син сямен усьтӥсько кыскись интыос. Отчы шедем адямиос лушкемкылъёсты верало ке, соку ик Йыр-визь дуннее шедё. Со лушкемкылъёс: Инмар, Инкуазь, Кылдысин. Малпасько, тынад эшъёсыд кыскись интые шедьыса, та кылъёсты вераны шедьтӥзы. Дарт кужым соосты соку ик ньылӥз.

- Пыраклы?! - Лёвалэн синъёсаз кӧшкеман ӝуалскиз.

- Кин тодэ, - лулӟиз песятай.

- Нош ӧз ке потэ? - Лёвалэн син азяз Марьёклэн пичи мугорыз пуксиз.

Онтипагай номыр ӧз вазьы.

- Песятай, нош мон со Йыр-визь дуннее шедьыны быгатӥсько-а?

- Быгатӥськод. Кыскись инты куинь нуналлы усьтӥське. Со вискын отчы шедид, лушкем кылъёсты верад ке...

- Соку мыным берен лагере мыноно, - Лёва усьтыр-табыр дӥсяськыны кутскиз.

- Сыл ай, пие, - лякытак дугдытӥз сое песятаез. - Тон умой-умой малпаськид-а? Йыр-визь дуннее вуылон - со чорыган кадь гинэ ӧвӧл. Тынад быдэс улонэд азьпалан на, нош со дуннее вуылыса берен ӧд ке поты... Анай-атайдэ, сузэрдэ, гурттэ но школадэ но ноку уд ни адӟы...

- Песятай, Марьёклэн отын нокин юрттӥсез ӧвӧл ук! - сюлмыз чигиськыса ик вазиз Лёва, - нош мон татын, гур вылын, э-эх! Вуыло со дуннее но берто, ваньмы ӵош бертом! - кроссовкиоссэ кутыны дыртӥз Лёва.

- Возьма монэ, - пересь коркась тылэз ӝуатӥз, сэргысь сандык доры вамыштӥз. - Мон но сьӧрад мыно.

- Песятай, ма тон... Ма тыныд... - Лёва ма вазьыны ӟудыса учкиз сандыкысь кыӵе ке мешокъёсты поттась пересь шоры. - Тыныд секыт луоз, мон огнам...

- Огнадэ мон тонэ уг лэзьы, - ӵогем кадь вераз Онтипагай но ӝог гинэ дӥсяз трос кисыё “хаки” тус штаньзэ, вылӥяз – кечато дэрем, корт питыртэтъёсын чебермам сьӧд ку куртка. Йыраз изьыяз танкистъёслэн выллем изьы, чыртыяз ошиз бинокльлы укшась арбери, нош кузь тушсэ лачмытак бичаз но пуныса герӟаз. Тыбыр сьӧраз маин ке тырмытэм котомка ошиз на.

Ваньзэ тае Лёва карысьтыз усем куакапи кадь пась ымын чаклаз. Дӥсяськемез бӧрсьы 90 аресъем песятай ог 50 аресъем байкер тусо луиз. Долкам нунокез шоры учкыса, со куаретӥз:

- Нош тон мар сылӥськод? Кофтаед-курткаед вань-а? Дӥсяськы.

- Лёва, аспӧртэм гипнозэ шедем мурт сямен, пал кыл но вератэк, сумказэ усьтӥз, капюшонэн толстовказэ поттӥз, мугораз кыскиз.

- Умой, - йырыныз сэзъяз Онтипагай, тазэ кымысад пон на, - йырын нуллон пичи гинэ фонарик мычиз, - Табере ойдо, сюрес азьын пуксьылом.

Песятай но пияш огминут ӵоже шып пукизы. Гур вӧзысь выжлёгет вылын кыллись куӵо писэй ныс-пыс кариз. Онтипагайлэн тусаз мур малпаськон вал: берытскоз на меда со татчы? Но воргорон соку ик урод малпанъёссэ улляз но капчияк кариськыса, султӥз.

- Я, ойдо, Инмарен ӵош...

Кыре потӥзы гинэ, уй соосты тём пеймыт шобретэныз бинялтӥз. Кымесаз инъям фонариксэ югдытыса, Онтипагай лапас пала вамыштӥз, отын, пеймытын, маке огшап выриз, ас понназ вераськиз но мешокен потӥз. Азбарысь брезент улысь вуж «Урал» мотиксэ поттыса, мешоксэ коляскаяз лачмытак интыяз.

- Ойдо, пуксьы, - нунокез шоры учкытэк ик вазиз пересь.

Лёваез кема возьмано ӧз луы, песятаезлэн аспӧртэм луэмезлы паймыса, со ури-бери бордаз интыяськиз.

- Та-ры-ры! - шыпыт уез вандӥз кӧшкемыт таргетэм. Толэзь югдытэмъя омырез куаӵыр-куаӵыр вандылыса, мотоцикл вылын пукись кык вужеръёс бусыетӥ лобатӥзы. Сайкам тылобурдоос бӧрсязы кема лопыръязы на, куалектэм пӧйшуръёс каразы мургес ватскизы. Юзырес...

Лагерь дорозь ог километр кылиз на вал, Онтипагай сюрес урдсы кариськыса, мотиксэ кысӥз. Корт валзэс куакъёс пӧлы пыдлогес ватэмзы бере песятай коляскаысьтыз пичи мешокез лякытак гинэ поттӥз.

- Кыӵе мар ни тон, луло? – мешок вадьсы мыкырскыса, кинлэсь ке юаз со. - Вождэ эн вай, но тон милемлы туж кулэ луод...

  1   2   3

Коьрта
Контакты

    Главная страница


69 ар ортчиз ке яке Кызьы Лёва, Марьёк но мукетъёс Йыр-визь дуннее вуылӥзы