Скачать 347.54 Kb.


Дата15.06.2017
Размер347.54 Kb.

Скачать 347.54 Kb.

Мынам нимы Домга



Мынам нимы Домга

I

Нош одӥг нунал. Кӧня ке часэз чидано луоз ни . Озьы котькуд ӵукна шуныт койкаысьтым султыны вырисько. Синмез усьтӥ, вӧлдэт дорынгес «Король и Шут» рок-группалэн постэрез лякемын но отын зӧк сьӧд фломастерен гожтэме адӟиське: «САЙКА, СИСЬМЕМ КУРЕГ ПУЗ!».



Султы ни, Доминик! - улӥ этажысен анае черектӥз.Ми карлэн шораз ик улӥськом, быдӟым коркан, кудӥз кылемын на милемлы бабайёсмылэн бабайёссылэсь.

Мон уг тодӥськы малы монэ Доминик нимазы. Анай-атай номыр ӧз вераське со сярысен. Кин тодэ, Форсаж нимо кинолэн меда соос фанатъёссы? Нош кыӵе та нуналлы луыны кулэ фанат, ниман понна аслэсьтыд пиналдэ кинолэн валтӥсь геройзэ кадь? Фамилиямы солэсь но аламагес кадь. Атаймы котьку данъя милесьтым национальностьмес, фамилие – Омга. Семъямылэн кушамат ниммы сыӵе вал но фамилиез но сыӵе ик кариз. Монэ ваньмыз нимало Домга, уг тоськы, шудыса-а, сереме уськытыны вырыса-а. Со понна школаын монэн даскык аресысен ини нокин эшъяськыны уг тыршы. Азьло вал ваньмыз умой, уг палэнско вал, шорам но нокин учкись ӧй вал но, котырысьёс но будо ук, котькудӥзлэсь пӧртэмлыксэс адӟо. Дышетскисько мон дасэтӥ классын. Та верос кӧня ке ачим сярысь но, кӧня ке ортчеме но вуоно адӟонъёс сярысь. Анай-атайёс косӥзы монэ дневник гожъяны. Берло валай ваньзэ соос лыдӟыса мыно шуыса. Соин ик, кыксэ гожъяны кутски. Таяз мон гожъясько ваньмыз воштӥськем нунал дырысен. Азьлояз дневнике гожъяй вал акыльтӥсь ӵош дышетскись пияш сярысь, кудӥз уен-нуналэн монэ мыскылля вал но шуге-леке уськытэ вал. Валамон ни, алама кылъёсын гожъяй вал со сярысь, аслым гинэ лыдӟыны гожъяй вал ук. Ваньзэ анаен атай ӵош пуксьыса лыдӟиллям. Нырысь соос монэ сыӵе гожъяськеме понна тышкаськизы, нош собере малпазы со пияшез интыяз пуктыны. Малпало вал дыр мыным юрттыны но, ваньзэ эшшо но секытгес гинэ каризы. Соку ини тӥни мон кутски кыксэ гожъяны, медаз тодэ номыре, маин мон улӥсько.

II

Мон шузи! Синмаськи нылашлы, кудӥз школаысьтымы самой йыртэмась пияшлэн ветлон нылыз вал. Со убир котькуд нунал коньдонэз кыска вал мынэсьтым, ӧй ке сёты жуге вал. Со нылашен тодматскем нуналэз туннэ кадь тодам возисько на. Соку котьку кадь ик юн жугем бераз монэ сарай пушкы ӝутыса нуо вал, отчы, штанэз кыльыса, думыса кельтыны, нош нылаш косӥз соосты монэ лэзьыны. Убиръёс малы ке но кылзӥськизы солэсь но сяласькыса монэ лэзизы. Тодӥсько на кыӵе чебер, кузесь пыдъёсыз, идеальной мугорыз шунды азьын эшшо но чебергес адӟиськиз мыным, сыӵе дыръёсы киноын классической крезьгурен будэто на. Шуом, Бетховенлэн «К Элизе» фортепиан пьесаез.



Синэз басьтытэк учкысал дыр быдэс улонэз, али ке но тодэ вайыса юзыр-кезьыр луисько. Одӥгзэ гинэ уг валаськы вал соку – малы сыӵе инлэн чеберлыкеныз нылаш пыд улысь жуг-жаглы укшась пияшен ветлэ. Пичи классъёсын ӵош вераськиськом вал со нылашен, нош бергес мукет компание сюрыса мон понна кыдёкын луиз.

Монэ уг ярато вал национальносте понна. Кин тодэ, атай фамилимес ӧй ке воштысал дас кык арес тырмыку, мон шоры но мукетгес ӧй учкысалзы меда? Тыршисько вал котьку ватыны аслэсьтым кин луэмме, нуллӥ ултӥясьёсылы пыжиськемъёсты. Валай, озьы тӥни кельшыны тыршыса, соос монэ ӧжытгес мыскылляло. Нуналысен нуналэ берытскыны кутски пыр адскись адямилы.

Туннэ нош тӥни огез нунал, куке чидано но улоно луисько сыӵе кирень кыльёс пушкын. Дӥсяськи, басьтӥ рюкзакме, улӥ этаже васьки. Анай чай юыса пуке вал ни. Ӝӧк вылын мынам кофеен кружкае сылэ, дораз ик кӧня ке вафлиос. Со тодэ ке но мынэсьтым чукна сиськымтэме, озьы ке но котькуд ӵукна огкадь ваньзэ дася.

Гужем куазь ке но, ӵукна салкым вал. Ӧвӧлтэм мылкыдэз эшшо но сӧрыса, тӧл сюрес вылысь вань тузонзэ мынам ымнырам пазьгиз. Мынӥсько но учкисько туж тодмо коркаос шоры: огаз укноын кин ке мукетыз шоры черекъя, мукет укноын пичи пинал кужмысь бӧрдэ но уг сёт егит анай-атайёсызлы изьыны. Мукет адямилэн йырыз висьыны кутскысал дыр ни таӵе огъя поромытӥсь куараослэсь, нош мон кадь дышем адямиослы со нокытчы уг йӧты.

III

Ӟечбур, школа! Ӟечбур, алама мылкыд! Ӟечбур тӥледлы, буш адямиос! Котькуд чукна кадь ик, ваньмыз бергаса сураськиз али йырам: адямиос, мылкыд, яратон но буш синъёсын ымныръёс.



Тани жингыртӥз гырлы! Уроке бере кылисько. Пырисько классэ, нош отын толон кадь ик пуко дышетскисьёс но кабинет шорын ик со нылаш, ымныраз сялӟон люкетэныз. Куке но киосмес кутыса школае лыктӥськом вал ук, нош таре… Ымдуръёсыз солэн самой ненег, лемлет сяськалэн куаръёсыз выллем, сьӧд синлысъёсыз шузимыто но лобӟытыны тыршо кадь лулдэ, нош баблес йырсиосыз чыжыт бамъёсыныз ӵош, воксё пумыто интые. Эхх… тодысал ке тон мар сётыны мон дась ӵош луон понна…Контактэ мон понысал ӵош пуксем фотомес, изьыкуд туспуктысал тонэ, яке пичиос кадь ватскемен шудысалмы. Вань эшъёс, кудъёсыныз вотэсын шудӥсько, вожъяськыса асьмос шоры учкысалзы.

IV

Нырысетӥ урок мыным туж умой тодэ кылиз. Дышетӥсь урок ласянь мар ке валэктэ вал но, азьло улонэз сярысь веранэ выжиз. Азьло со Удмурт кун университетын дышетӥсен ужам. Кутскиллям сокращениос но сое нырысь ик ужысь поттӥллям. Соку ик со сюрем школаямы, удмурт кыллы пиналъёсты дышетыны. Мон туж умой вераськисько вал удмурт кылын, нош мыскылляны яратэмзы понна тыршисько вал кылъёсты сураны, ӝынызэ дышетӥсьлэсь юаса предложениосты кылдытъясько вал.



Дышетсконэ мед кылёз дышетсконэн ик. Нырысетӥ интые пуктэме потэ дышетӥселэсь веранзэ:

-Тӥ тодӥськоды-а кыӵе тунсыко ветлыны студентъёсын ӵош практикае? Дышетскыны пырем бере ваньзэ валалоды. Соку ваньзы нылашъёс гинэ мынӥзы. Жингыртӥ школае, вераськи мынон сярысен, кӧлон инты ласянь. Собере люкаським ваньмы ӵош но ширтӥм вокзал пала. Нош отын ваньмыз кесямын, кизямын, зынэн чиданы ик уг луы. Пуксимы автобусэ. Паймытӥз вал нокин уг пукы шуыса. Трос ик мыныса ӧм вутске, автобусмы тӥяськиз, мукетаз пуксёно луим. Со автобусын калыкез вал тырмыт. Нылашъёс кин кызьы сылыны выризы. Адями сяна салон пуштӥ пересь песянайёслэн ӟазегъёс но лобало вал кадь ини. Кематэк азьын ик пукись лапег мугоро кӧй воргорон студенткаосты серематыны кутскиз. Пал пельын гинэ кылӥ: мунчояз ӧте вал кадь нылашъёсты. Милемын ӵош со пиосмурт но потӥз. Соку юай солэсь, тӥ, бон, татын школалэн директорез уд луиське-а шуыса. Зэм шуиз. Шуи, мон ведь тӥледлы жингыръяй вал студентъёслэн практиказы ласянь.

Быдэс класс соку ик горыны кутскиз, собере ӧжыт чалмытскем бере, дышетӥсь веранзэ азьланьтӥз.

- Со милемыз школае ваиз. Сьӧросды кытын шуыса юан сётӥ вал но, директор серем пыр гинэ шорам учкиз. Собере монэ аслаз кабинетаз чортӥз, жӧк вылаз поттӥз дасяса возем виназэ но, чорыгзэ но. Уг юиськы шуисько. Пал синзэ кыньса ымнырам учкиз но шуэ: «Таиз тани вань удобствоос ни милям, мукетэз овол». Соиз сокем ик кышкыт учыр ӧй вал ай со, олокытысь быдэс уллё сьӧд куакаос вуизы. Тӥ тодӥськоды-а мар со сыӵе сьӧд куака уллё? Малпаське, йырдэс бергатэ ай ӧжытак.

Ваньзы шып пуко.

- Пияшъёс вал со, кудъёсыз мотикъёсын нылъёс доры вуиллям. Охранниклы нокинэ пырыны эн лэзь шуыса верай но, солэсь толкез ӧз луы кадь, песятаез пуктӥллям ук. Ачим потыса вераськи но олокызьы кошкизы. Ӧжыт улыса вуиз ӝужыт воргорон, чыртыяз чиньы зӧкта зарни жильы ошемын. Пырыса ӧз вуы, нылашъёсты вина юыны чортыны кутскиз. Школаез возьмась песятай мугор пушказ ватскем кадь мургетыса ветлэ котырын. Аслэсьтыз телефонзэ но сётыса кельтӥз вал директор, жингыртыны ӧӟ луы, тӥяськем вылэм. Дырекъясь куараен валэктыны выри ни со етӥз пиосмуртлы, нылашъёс пиналэсь на, эн етылэ соосты, пожалуйста, шуыса. Валаз. Кошкем бераз, директор валэктӥз мыным, со пе, ожмаськонысь бертэмын, табере участковый луыса, пе, ужа.» Сыӵе кылъёсын дышетӥсьмы йылпумъяз аслэсьтыз веранзэ. Собере урок но йылпумъяськиз. Мар вал йырам предмет ласянь - ваньмыз вунӥз. Кемалась аслам дуннеям кошкыны дышетски ни мон. Шедьтӥськод кыӵе ке но усьтон-кыл но со бордысен малпанъёсты бергатыны кутскиськод. Туннэ вал со кыл – муза. Кызьы меда мон нылашъёслэн сюлэмъёссы доры сюрес шедьтысал, шоретӥ дауръёсы ке улысал? Кураськись луыса коньдон люкаса ветлысал, яке рыцарь луысал? Кин тодэ, сыӵе виръёсы но вань дыр. Ӧвӧл. Кытысь на мыным сыӵе виръёс, кураськисьёслэн гинэ ке ини.

Куспетӥ карыса поттӥзы малпанъёсысьтым. Ваньзы мон пала берытскыса серекъяло. Малпаськыкум оломар кыл вераса вуттӥськем лэся. Уг тодӥськы мар.

V

Доре бертӥсько… Тужгес но мылкыдэз жутӥсез мынам нуналам, со бертыны корка, комп сьӧры пуксьыны, кино отын учкыны, яке шудонэ выйыны. Мон яратӥсько фантастикаез, кӧшкемыт киноосты учкылӥсько но, собере изьыны секыт, оломар но вӧтаны кутскисько. Котькызыьы кышкыт луиз ке но отын, со мукет дунне. Отын тон учкыса гинэ пукыны но быгатӥськод, нокин тонэ уз ултӥя, уз серекъя, уз мыскылля. Со дыре ик тон быгатӥськод кивалтыны миллионлэсь ятыр адямиен. Отын кышкало мынэсьтым, кылзо монэ. Компьютер пушкын мон вал эксэй. Азьло со ваньмыз мыным зэмос дуннеез воштэ вал, нош али мыным татын ик умой.



Корка пыри. Нокин дорын ӧвӧл на. Монэ та паймытӥз. Атай-анай,кызьы соос верало вал, быдэс улонзэс археологъёс луыса удмуртъёслэн вашкала дауръёсы улэм интыосазы ужазы. Кыкетӥ курсозь соос ӵош дышетскиллям. Кык ар ог-огзэс адӟытэк улӥллям. Огпол гинэ сиён-юонлы ӵош мыныны кылдэм. Сюрессы нюр пыр ортче вылэм. Анае сюресэз тодӥсько шуыса, азе ик мыныны кутскем вылэм но, шуак шашы пушкысь лобӟем куакалэсь кышкатскыса берлань чигнаса усьыны кутскем. Нош атае сое киыныз кутыса вуттэм, медаз кынмы шуыса, аслэсьтыз кофтазэ но кузьмам. Отысен тӥни кутске соослэн яратон герӟетъёссы. Огшоры гинэ учыр кадь гинэ но, кытысь нош со сьӧд куака татын пумиськиз?

Мусо гинэ тӥяськыса бырем компьютере. Атай-анай бертытозь шудыса но, кино учкыса но вутсконо на. Малы ке но туннэ уз ни бертэ шуыса шӧдӧнэ вань.

VI

Сериаллэсь одӥг сериязэ учки, «Blackcrow» шудонэн шудӥ, гуртысь ужез ужай, нош соослэн бертэмзы уг кылӥськы. Сылӥсько укно дорын. Ку бертозы ни соос? Куараен асэныд вераськыны но кутскод ай татын.



Кухняысь чипсыосты шедьтыса нош ик укно доры султӥ. Бертыса вуизы но жогак пыризы. Шумпотыса васьки пумитаны.

- Приве..! – ӟечбуръяськыса но ӧй вутты. Анае куспетӥ кариз.

- Ӝог дӥсьтэ басьты, асьмеос кошкиськом!

- Мар луиз?

- Берло. Жог выр – черектӥз со.

Вылэ тубыса кӧня ке арбериосты поныса вуттӥ. Собере анае киез кутӥз но улӥ этаже сьӧраз кыскыса кошкиз. Со дыре ик вутски на рюкзаке ноутбукез поныны. Атае машинаын витьыса улэ вал ни милемыз.

Туж ӝог мынӥм соку машинаен.

- Анай, атай, мар луиз? – юаны вырисько мон соослэсь. Куинь-а, ньыль-а пол выри юаны, нокин ӧз вазьылы.- Э-эй! Кылӥськоды-а монэ?

Ог дырлы чалмытгес луи но телефонысьтым книгаме лыдӟыны кутски. Анае котьку черекъя вал мон вылэ, синдэ быдтод шуыса, нош али вазьылӥсь ӧвӧл. Мынӥськом сю иськем часэзлы, пичи скорость ӧвӧл ке но, выль машинаын со уг шӧдӥськы. Кемалась ӧвӧл атае та «Шкодаез» басьтӥз. Туж кема ветлӥмы кызь арес «Ниваен». Тямыстонэ вуэ ке, со мынон дыръя ик сэртӥськыны кутске вал ни. Туж яратӥз со сое. Люкиськемез но уг поты вал, нош ӵем тӥяське шуыса но, зэмзэ вераса, мукетъёс но серекъяло ни шуыса кредит басьтыса машиназэ выльдыны малпаз. Кулытозяз тырмоз дыр ай со коньдон тыронэз, нош машинаез ӧйлась. Та выль питрано эшез ваньмыныз кельшиз кадь солы, дуныз сяна.

Мон книга лыдӟонме азьланьтисько. Атай-анай шоры учкисько, соос асьсэ малпаназы мыно, монэн йырин ӧвӧл кадь. Укноын вал нюлэс. Котыр лыз-вож писпуос. Таӵе дыръя возь вылтӥ бызьылэм потэ, гамак вылын шунды азьын кылльыны. Собере берлань учки но олокытысь гинэ бадӟым машинаос потӥзы. Ваньзылэн машина вылазы сьӧд куака суредамын вал. Милям азе потыны кутскизы. Атай эшшо но кужмогес газлэн педаляз зибыны кутскиз. Пичи гинэ кылемын вал ни милемыз шуккыны, пумитэ лыктӥсь грузовик сюрес ӧз сёты. Берлань чигназы но выльысен ӝоглык люкаса палдурысен шуккизы. Пичи машинамы возиськыны быгатытэк сюрес вылын, дурлань кымалским. Атайлэн ымнырыз быдэсак вал виресь, нош анае уг шока вал кадь ини.

- Басьты тае но бызь, пие! – шуиз мыным атае, медальон сётыкуз.

Бадӟымесь синкыли шапыкъёсыз гылто вал ни виресь ымнырзэ. Бардачокысь качы поттыса, ӝогак ременез вандыса куштӥз. Тау солы, капчиен быгатӥ ураме потыса кошкыны но вань кужмысь кутски нюлэс пушкы бызьыны. Ӧжыт дыр ортчыса, кык ыбем куараос кылӥськизы. Ваньмыз вал ини валамон. Куректонлы чидатэк, синвуаськыса, бызисько азьлане. Бызьыса вуи ошмес дорозь. Солэн жильыртэм куараез кемалы тодэ кылиз йырам. Каньыл кариз сюлэмме, небыт вуэныз вань пушкын люкаськем секытлыкез но гылтӥз кадь. Тырмыт юэм бере вузэ, дораз выдӥ но пичи но вырытэк кылли.

VII Куазь пеймытаны кутскиз. Вань кужмысь изёнтэм возиськыны тырши. Тани шуисько, кӧня ке азьланьто сюресме но собере ини инты шедьтыса, кӧло. Ӧз луы малпамъя, изён дуннелэн аслаз катъёсыз монэ пушказ кыскизы. Вӧт йыре пыриз: мон мунё но монэ кин ке кыска вылӥысен сӥнысъёсын, учке серекъя, сыӵе зол. Сайкасько. Усьтӥсько синъёсме, нош отын… Нылаш! Кытысь со татын нюлэс пушкын? Пайми. Со но ӧжытак чигназ. Озьы ке но, синзэ басьтытэк, валаны тыршыса кин луэмме, вылтырме, дӥсяськемме учкыса сылэ.

- Мынам… нимы… Домга, ой, Доминик – кепырасагес вераны кутски мон – Тонэ кызьы?

- Нош монэ Ӟӧльгыри. Мар тынад ки улад?

Медальонэ сярысь вунэтӥськем вал ни.

- Тае мыным атай-анае сётӥз.

Киын кыллись арбериен тунсыкъяськыса, вунэтыны ик кутски кадь матын сылӥсь нылаш сярысь. Со шып гинэ кыл но вератэк учке шорам. Огшоры питырес азвесь медаль, маин меда та быгатоз мыным али юрттыны? Юанъёс валэктонъёслэсь тросгес.

- Ойдо ми доры, семняеным тодмато.

Мон куалектӥ. Нылаш ведраосаз каньыл гинэ ву омыртӥз но коръёс вылэ лёгыса выж вылтӥ кошким.

Мынӥськом гуртлэн урам шортӥз. Ваньзы маин ке выро: кин ке тӥрлык лэсьтэ, кин ке коръёс дася, кин ке басма куэ. Лэсьтӥськонзэс ик куспетӥ карыса ми шоры учко. Синме етӥз дӥсьёссы, бырись удмурт калыклэн выставкаяз но сыӵе ик вал кадь.

Пырим корказ. Нокин ӧй вал. Та дыре нокинэн адӟиськеме но уг поты вал, одӥг гинэ малпаськон йырез висьытӥз – кытын кӧтэз тыроно. Кема витёно ӧз луы, пуктӥз ӝӧк вылэ шыд, котырес нянь но майонез. Малпай, лавказы но кыдёкын ик ӧвӧл дыр таослэн, зэмос дуннелэсь палэн ӧй кошкы дыр. Паймытэ гинэ вал соиз - котькытын пӧйшуръёслэн куоссы, электричествозы ӧвӧл, вӧлдэтын керосиновой лампа ошемын.

Жогак корка мӧйыгес пиосмурт пыриз. Ваньмызлэн кадь ик гадяз куакалы укшась пус ошемын. Нош ик куака.

- Данейко,мар малпаса палэнысьёсты татчы нуллӥськод!? – монэ адӟем картэк, вожзэ поттыса кутскиз со пиосмурт.

- Кышкамын вал со, ӧй быгаты кельтыны.

Пересь азьланьтӥз монэ адӟытэк нылаш вылэ черекъянзэ. Ӟӧльгыри бӧрдыны кутскиз. Дугдытэм потэ вал но, кышкай, эшшо но тросгес етоз со нылашлы шуыса. Олокытысь гинэ солэн атай-анаез пырыса вуизы.

- Учке, мар дауртӥз нылашды! – чиньыеныз шорам возьматыса, черекъя пересь.

- Бон, со пичи уг ай. Маке кароз со милемлы? – синкыли пыр валэктэ нылаш. Атай-анаез шып гинэ сэрегын сыло, пересьлы вазьыны дӥсьтытэк.

- Маке ке но кариз ке, тӥ винамат луоды!Мон верай аслэсьтым кылме! – чиньыеныз семня шоры сэзъяса, потыса кошкиз. Ӧссэ пытсакуз, ӟирыез ик лобӟиз.

- Бон, мар, пуксьы, куно луод, - шуиз нылашлэн атаез. Коть мар ке но, малпай мон. Юрттӥсе бӧрдыны дугдӥз. Серекъякуз туж мусо вылэм со.

Возьдаськыса номыре сиеме но уг поты вал мынам, нош соос выльысь но выльысь сюдыны выро вал монэ. Кыкетӥ порциязэ но пононлэсь пумитъяськи ке но, анаез мыняса гинэ учкиз мон шоры но сёравно азям быдэс тэркыен сиён пуктӥз. Та ваньмыз вал мыным сыӵе матын но тодмо. Нош ик атай-анаез тодэ вайыса бӧрдыны кутски. Либатыны выризы ке но, мыным сыӵе шунытлыклэсь эшшо но алама гинэ луиз.

Нырысь ик монэ мунчое нуллӥзы. Собере небыт, мамыкен тырмытэм валесэ выдтӥзы. Пегӟон сярысь малпаськыны кутски вал но, шӧдыса ик ӧй вутты, кызьы умме усиськем.

VIII

Нылашлэн йырсиме маяллямезлэсь сайкай. Султӥ, кисыосме эсекрисько, медальон ышем.



- Медальондэ утчаськод? – юаз мынэсьтым нылаш.

- О-о – вази солы меӵак. Ӟӧльгыри кышкатскиз.

- Сое атае тынэсьтыд басьтиз вал. Пересьлы сётӥзы. Собере дораз мыныны косӥзы тонэ.

- Макелы со солы?- паймисько мон.

- Уг тоськы.

- Ойдо со доры.

- Кошким – небыт гинэ мыняса вераз нылаш. Миськем пыдкутчанме кутчай.

- Тон миськид?

- Мон. Уг кельшы?

- Наоборот.

Со сьӧры потыса кошки.

Медальон котыре ваньзы люкаськиллям вал ни. Синзэс басьтытэк мон шоры учко. Дораз мынӥ но сое ӝоггес кисыям ватӥ.

Пересь вазиз мыным:

- Кызьы тынад нимыд?

- Омга Доминик, - шуи мон.

- Ми тодӥськом тынэсьтыд атайдэ. Со котьку милемлы юрттэ. Кытын со туннэ?

Синкылиос асьсэос вияны кутскизы.

- Со..соосыз… ыбизы…

Ваньзы шып сылӥзы. Пересь сяна, нокин юаны ӧз дисьты:

- Со туж умой адями вал. Узьмагын мед улоз. Кулон азяз сётӥз-а со тыныд тае?

- О-о.

- Ӧз вера-а марлы та кулэ?



- Ӧз.

Вань люкаськем пересьёс огазе кенешыны люкаськизы. Кематэк шау карыса но огъя кенеш кутыса, одӥгез пересь вазиськиз мыным:

- Ми тонэ атаед понна ӧм кельтэ, амулетэд понна. Вашкала гожъямъёсын верамын: кин шедьтоз та арбериез, со ик кулэ та бадӟым кужымен кивалтыны.

- Куинь ар ортчыса, кошконо луод тон ми дорысь. Утчано луод аслэсьтыд сюрестэ. Нош али дышетом тонэ ваньмызлы, мар кулэ тодыны медальонлэн кужмыз сярысен. Етылӥд ке, быдэс мугорад дыр тынад али пыӵаз солэн кужмыз.

Ваньзы кошкизы, огнаме сылыны кельтыса. Мар веразы та пересьёс?

Гуртлэн пумаз мыныса, малпаськыны ӧдъяй, мар кароно ,бон,та таре? Шуак олокытысь куара кылӥськиз.

-Эй!Дышетскыны кошким! – черектиз мыным со нылаш. Берытски вал ни юаны но, сотэк но туннэ трос валантэм выльзэ кылыса акыльтӥ ни.

IX

Школалы уг кельшы вал со. Шонерзэ вераса, со котырес инты, кытын ваньзы пукыса дышетско но нокин куспетӥ потыса уг кошкы. Нырысь ӧй адӟы маар выремзэс, кыӵе ке фокусникъёслы укшало вал. Собере матынгес учкыны кутски но, паймемен ымез ик усьтыса, сӥтян вылэ пукси.



- Мар пукиськод? – вазиз со нылаш.- Ойдо милемын.

Бызьыса мыныку со котырес инты доры, нылаш кутӥз но мечсэ инме сэрпалтӥз. Соиз одӥг шоры дугдӥз но кылле. Собере Данейко сое синмыныз нуллыны кутскиз но кален гинэ кияз васькытӥз.

- Тон но эскеры! – шуиз со мыным.

Кутӥ со мечез киям. Сыӵе вал со чидантэм секыт. Нырысь утчай одӥг киен жутыны, собере кыкеныз. Вылӥе но сэрпалтыны выри но, кӧня ке сантиметрлэсь кыдёке ӧӟ ӝутскы.

- Тон эн малпа солэн секытлыкез сярысен. Адӟы со тылы кадь капчи шуыса. Ачиз ик ӝутскоз.

Серекъя, дыр, малпай, но оски – ваньмыз одно ик пӧрмоз. Нош ик мечез серпалтӥ инме. Табере со ӝутскиз но кин ке учке шуыса малпамысь, берлань усиз.

- Тӥни ук, ваньмыз тынад пӧрмоз! – пальпотӥз нылаш.

Азьланьтӥм дышетскон пала сюресмес.

- Тани татын кивалто тылэн, отын вуэн, отӥяз йӧэн. Нош мон, кызьы тон валад дыр ни, тӧлэн вырисько. Эскеры астэ ваньмыныз. Тон мукет шуо ук. Быгатод ваньмыныз ужаны. Оскисько тыныд.

Нылаш аслаз инытяз бызьыса кошкиз, нош мон тылэн шудӥсьёс доры мынӥ.

Тылэн факелэз куктӥ но шораз учкыны кутски. Данейко монэ тылобурдоез тылын адӟыны дышетӥз. Со дыре ик тыл горд бурдолы берытскыса, ваньзы вылтӥ лобаны кутскиз.

- Тон… адӟид-а?Тон…сое…адӟид-а? – шыпырто котькуд паласен.

Мынӥ азьлане, ву доры. Учкыны гинэ кутски шораз но, ву берытскиз дельфинъёслы, кудъёсыз шумпотыса тэтчало ву вылтӥ. Мынӥ йӧ доры. Йӧ пушкысь анае потӥз. Номыр карыны быгатытэк учкыса сылӥсько шораз. Со кален гинэ мон шоры лыктэ. Берлань чигнаны кутскыса, усьыса кошки. Мон дорозь пичи гинэ кылемын вал ни, йӧ пилиськем куара кылӥськиз. Синэз усьтӥ но, дорын монэ либатыны тыршыса, пересь пуке. Ветлыны кужым кыльымтэ ни вал. Ки вылазы монэ корка пушкы нуизы. Синэз усьтыку мон кроватьын вал ни. Нош ик валаса ӧй ыутты умме усемме.

Х

Ӵукна. Урамын музъем вылэ оломар пусъёс гожъяса, Данейко пуке вал.



- Мар кариськод? – юай мон.

- Номыр. Тонэ дышетскыны мыныны витисько вал.

- Дышетскыны?!

- Бон, татын дышето на, ӧд вала на? Кошким ни, нырысетӥ уроке бере кылём.

Урокъёс туж тунсыкоесь вал. Но наукаосты дышетэм уг ни пот вал мынам, кемалась тодэм арбериос кадь йӧтэ. Со куакаос эшшо котькытын лобало, нокин мон сяна уг адӟы кадь соосты. Шонер веразы кадь, мон - мукет. Бон, ваньмы но асьмеос пӧртэмесь. Соиз гинэ вань, нокин пумозяз уг эскеры ассэ, аслэсьтыз пуш дуннезэ. Ваньзы кышкало бугыръяськонлэсь, котькудиз малпа шузимоз шуыса…

Кык арез ортчытӥ ни мон та интыын. Нуналысен нуналэ ваньмыз тросгес но тросгес акыльтыны кутскиз. Шонерзэ верано ке, татын ӧй вал сыӵе мыскыллянъёс но ултӥянъёс, кудъёсыз вал огшоры улонын. Соиз мыным кельше. Каллен дышыны но кутски кадь ини та улонлы, интернет гинэ ӵем дыръя уг тырмы. Тылэн но мукет арбериосын ваньзылэсь устогес кивалтыны дышетски. Мае быгатӥсько – ваньзэ Данеколалы верасько. Со мусо нылаш. Аслэсьтым сюлмысь мылкыдме гинэ солы усьтыны уг дӥсьтӥськы. Малпасько, кылдэм ке, одно ик ӵош луомы соин.

XI

Дневникме туннэ понна гожъяй но ураме потӥ. Туннэ кӧшкемыт веранъёслэн ӝытсы. Мыным дас куать аресем тырмиз ни, таре лэзёзы ни пырыны.



Котыр пеймыт. Одӥг укноын гинэ тыл ӝуа. Ваньзы люкаськиллям кадь ини мунчое, котьку отын егитъёс ог-огзэсты кӧшкемыт веросъёсын кышкато.

Пумитам каллен гинэ кыӵе ке но сьӧд вужер лыктэ. Мынэсьтым лапег вал со. Одӥг метр кылем вал ни мон дорозь. Султӥз но учкыса сылэ. Нокыӵе дӥсез но ӧй вал кадь солэн. Огшоры сьӧд вужер.

- Кин тон? – юай мон, кӧня ке кышкаса.

Нокин ӧз вазьылы. Ӝогак шораз учкыса, шырпу ӝуатӥ но со кытчы ке ышиз. Пияшъёслэн дыр серем каронзы шуыса малпай но, азьланьти мунчо пала мынонме.

Мунчо пушкын ваньзы керосиновой лампа котырын люкаськыса пуко вал ни. Кин ке пеймытысен вера вал, кин ке споръяське вал, кин ке котькуд куаралэсь кышкаса пуке вал. Одӥгез пияш вераны кутскем вал ни аслэсьтыз вероссэ:

- Азьло та гуртын кубызэн шудӥсь крезьгурчи улэм. Одӥг вуж коркан улэм со, али отын нокин но ӧвӧл ни. Пересьмытозяз аслэсьтыз малпам крезьгурзэ шудыса пукем со. Огпол малпам крезьгурзэ шудыса быдтымтэ, йыгаськытэк, кулон пырем корказ. Табере котькуд уй, дас кык часын уйин, со шудыса йылпумъя кутскем крезьгурзэ.

Ваньзы ӧжытак кышкатскизы, кин ке тыл доры матынгес пуксиз. Нош кудӥз ке кужмогес ассэ возьмат ыны тыршиз но пеймытэгес ватскиз.

- Пересьёс верало вал, огез пе, нылаш губи бичаны нюлэске мынэм но йыромем. Учке пе, кыӵе ке пияш кыштыр гинэ пумитаз лыктэ. Ну, нылаш пумитаз бызьса лыктэм но, юалляськыны кутскем, кытысь тон шса, малы таӵе дӥсяськемын тон пе, шуэ. Со пияш валэктэм, озьы но озьы,пе татысь гуртысь мон. Ваньмы ӵош тупаса пе гуртамы улиськом. Мынӥллям соос кыкназы пияшлэн гуртаз. Нош отын гурт интые куашкам вуж коркаос, турынэн но писпуосын пытсаськыса быриллям, кудӥз ке ӝуамын, кудӥз ке воксё пеньлы гинэ берытскемын. Гурт пумын гинэ огназ туж чебер корка сылэ. Татын нокин ӧвӧл ук пе шуэ нылаш. Пияш пумитаз: «Тӥни бускеле сылэ, нош татын эше улэ». Кышкатэк азьланегес мынӥллям. Отын пересь пе сылэ. Пияш пе шуэ тани мынам выны таиз. Нылаш эшшо но тросгес паймем но озьы ик корказ пыриллям. Ӝӧк сьӧрын пукыкуз пересь со нылашез ӧтьыса ураме поттэм. Нокинлы эн вера пе шуэ адӟемез сярысен. Бон, та нылаш чидамтэ ни, юалляськыны кутскем марлы озьы но мар татын таӵе? Собере пересь ваньзэ дыртытэк мадем солы. Бай вузаськись эшез вылэм со пересьлэн. Номыре уг жаля вылэм. Котыр гуртысь калыкъёс но со вӧзын ваньмыса улӥллям. Нош одӥг нуналэ лыктэм со гуртэ воштӥськон, совето власть шуонзы. Толон сюдыса возем калыкез ик эшезлы пумит ӝутскем, корка дораз сылӥсь кыз вылэ ик сое ошыса кельтӥллям. Кышноезлы но пичи пиналэзы номыр кельтытэк амбарысьтыз вань пызьзэ ӵужыса поттӥллям. Корказэ ӝуатӥллям. Та пересь быгатымтэ ни чидаса кылльыны сыӵе ултӥянъёсты, ведон кужымъёсыз вань вылэм солэн. Вань мыскыл карись адямиослы бурмонтэм висён келям. Кулыса бырем беразы, эшезлэсь семнязэ котькулы пинал, ноку кулӥсьтэм карем. Трос аръёс пе уло ини озьы, ваньмыз соослэн умой. Нылашлы шуэм: «Кошкы, вунэт ваньзэ но татчы эн ни берытскы». Со нылаш кылзӥськымтэ, синмаськем пияшлы. Соку пересь шузимытэм нылашез, кулӥсьтэм карем. Табере пе, со котьку губияса ветлэ нюлэстӥ, аслыз кулон шедьтытэк. Адямиос адӟиллям со гурт пумысь чебер коркаез но, огназ калтыртӥсь губиясь нылашез но.

- Ой пӧяськись! – черектӥз кин ке но.

- Ымдэ пытса ай, аслыз тӥни пель сьӧраз кубыз кылӥськем – шуиз мукетыз пияш.

- Со зэм – вожез потӥз мукетызлэн.

- Ма сярысь тӥ? – юай мон.

- Асьме гуртын одӥг вуж корка вань, адӟид дыр ни?

- Вань…кадь – тодэ вайыны тыршыса, верай мон.

- Тӥни со коркан пересь улэм, шуизы мыным. Кубызъёсты ачиз пе лэсьтэ вал. Гурт шулдыръяськонын но пеш удэ вал котьку. Туж шумпото пе вал ваньзы солы. Тӥни пересьмем бераз шудыса быдтымтэ одӥг крезьгурзэ но котькуд уй кылӥське корка дораз кубыз куара. Ачим кылӥ! Чынзэ но!

- Тырмоз ни, алдаськись – шуизы солы сэрегысен.

XII

Урамысен паймымон ветлэм куараос кылӥськизы. Ваньзы ӟус улэ пегӟизы. Мон укное учкыса вуттӥ.



- Эн учкы, уг яра – шыпыт вазиз кин ке но мыным.

- Мар бон со? – озьы ик шыпыт юай мон.

- Шып ул, кылозы. Нюлэс албастыос соос. Туж шер ветло соос татӥ. Пумиськид ке соосын - шузимод.

Ӧжытак ӝутскыса ӝыны адяммиосыз адӟи. Ваньзы урам шортӥ тэтчаса мыно вал.

- Мар ке адӟид-а?

- Ӝыны адямиез – шуисько паймыса.

- «Палэсмурт» нимало соосты. Вазьгес на туннэ ортчо ай соос.

- Марлы бон ваньзы сыӵе ӵош ветло? – юасько мон.

- Соосты Азьдага пӧйшурасьёслы пумит люказ вал. Нош сое егит пияш виыны быгатӥз. Табере ваньзы ӵош ветло, асьсэлы выль азьветлӥсь утчало. Кин тодэ, шедьтӥллям дыр но ини.

- Вераськонъёс гинэ ук со – шуиз кин ке но.

- Кошкизы кадь ини…

Шып гинэ, номыр юалляськытэк, вань егитъёс корказы бертӥзы. Ми но Данекоен ӵош ширтӥм азьлань. Туннэ со вал синэз мальдытӥсь тӧдьы дэремен. Тыр толэзё уе со эшшо но чебергес адске вал.

- Доми, кузьма мыным одӥг кизилиез – вазиськиз со мыным.

- Быгатысал ке пичиятыны сое, али ик банкае поныса кузьмасал.

- Шузи, адямиос сое сотэк но ог-огзылы кузьмало.

- Кызьы?


- Кизили шоры возьмато но, матын сылись адямилэн нимыныз нимало.

- Кытысь тон сое тоськод? – паймисько мон.

- Лыдӟи вал – мынектэ со.

Корка вуэм бере туннэ кылзэм веросъёс изьыны сётытэк, кема йырын бергазы на.

XIII

Чуказеяз чукна ик малпаськыса ветлӥ пересь доры медальон сярысь юалляськыны мыныны.



Ӝыт вуэм бере гинэ дӥсьтӥ со доры пырыны. Ӟечырась пукон вылын кыске вал чильым но кияз кыӵе ке книга возе вал.

- Кыӵе книга лыдӟиськоды? – юай мон.

Нырысь мар юамме валатэк шорам долкаса гинэ улӥз. Собере тодаз ваиз кадь книгаез сярысь.

- А, бон, та Кафка. Номыр сыӵеез ӧвӧл- куштӥз таизэ но сэреге,мукетъёсыз пушкы.- Кыӵе ке юанэд вань?

- Медальон сярысь. Марлэсь со сыӵе? Эшшо котькытын сьӧд куакаос пумисько. Азьло нокытчыям уг еты вал но табере соос тужгес данак луизы.

- Шонер. Вань дыр мар ке но тае ваньзэ валэктӥсь. – сандыксэ усьтӥз но зарни книгазэ поттӥз.

- Таиз бон мар книга? – пайми мон.

- Таяз вань валантэм пӧйшуръёс но усьтымтэ кужымъёс сярысь верамын. Быдэс дуннеын соос куинь гинэ. Кыкетӥзэ лушказ но ыштиз милям ик ведонмы. Кин ке вера вал, уйпал ёросъёсын шедьтӥллям сое шуыса. Нош куинетӥез Помпея карлэн изъёсыз улын кылле.

Книгазэ усьтӥз но ваньмыз мар милемлы кулэ нырысетӥ бамаз ик гожтӥськиз.

- Татын верамын: медальон аслэсьтыз кузёзэ шуг-секытъёс пыр ортчыны ӧте. Соку гинэ, пе, быгатод валаны аслэсьтыд луонлыктэ та дуннеын но малы тон та медальонэн быръемын. Тани улӥяз ик векчи шрифтэн гожтэмын – сьӧд куакаосты учкылоно, соос сюрес возьмато.

- Ну и мар мыным таре пе кароно? Со валантэм пӧйшуръёсты утчано?

- Малпаськемед ӧвӧл-а вань мадёсъёсын одӥг гурт сярысь гинэ верало шуыса?

- Ӧвӧл кадь…

- Люка арбериостэ. Мынод медальонлэн куремезъя, ватэм малпанъёсты валаны.

Мынӥсько но малпаськисько: мар карисько мон татын? Толон гинэ атай-анаен ӵош вафлиен кофе юса пуки, нош жугозы ни школаын шуыса, кышкаса, табере кыӵе ке но супергерой выллем медальон понна олокытчы мыноно. Кутоно асме, азьланез сярысь малпаськоно.

Корка пыри. Данейко кыӵе ке ческыт сиён пӧра вал ни. Дораз дас ньыль аресъём пияш пуке. Азьло сое адӟеме но ӧй вал.

- Тодматскы, Ӟичы. Сопал урамын улэ. – шуиз со пияш шоры возьматыса.

Ымнырыныз та пияш киргизлы укша вал: векчи синъёс, паськыт бамыз но визьмо ымнырыз.

- Со удмурт-а? Зэм но? Кыргыз тусъем ук – шуи мон чиньыен шораз возьматыса.

- Тон кинэ кыргыз шуид!? Эй! Мон шоры учкы! Тон, визьмо! – черекъяса гинэ вуттӥз но, султыса, гадьзэ азьлань поттыса, кияз тыл кутыса азям сылэ вал ни.

- Сабыр визьдэ кут, Ӟичы. Мыскыл карыса ӧз вера со. Бессермян со. Ойдо, кыкнады ик пельнянь лэсьтыны юрттэ ай – шуиз со милемлы.

- Монэн ӵош дунне вылтӥ калгыны кин мынысал меда?

- Мон мыно! – шуиз Данейко.

- Данейко мынэ ке, мон но мыно! – шуиз Ӟичы. Кыӵе ке валантэм кураосын со вераське.

XIV

Сюрес вылэ вазь ӵукна потӥм. Ми сьӧры Тӧл нимо пуны калъяськиз на. Котькуд нунал жыльызэ тӥяса мозмиське вал со. Сюрес вылын но тӧл кадь ик бызьыса кошке но нюлэске я луд кечъёсты вае, я мукет пӧйшуръёсты вае вал. Йыромыны кутскыку инмын сьӧд куакаос лобаса милемлы сюрес возьматов ал. Гурезьёсты, паськытэсь шуръёсты ортчим но гуртэ сюрим.



Милемыз отын пинал семня пумитаз. Корказы пырыны ӧтизы. Пумит ӧм луэ. Пырем бере ик паймим: пушказ ваньмыз вал туала куремъя, компьютерзы но вал.

- Интернетэ пырыны яра-а – юай мон ситьпужыё горд пияшлэсь.

- Яра, ачим гинэ нырысь потто.

- А транспорты вань-а кыӵе ке?

- Вань – шуиз со – Возьматом-а?

- Кулэ ӧвӧл на. Берло. Тани нырысь иворъёсты учко ай.

Контактэ пырыса одӥг дыр куспын трос пол ымныр воштӥськиз кадь мынам. Серекъяса но вутски, мӧзмыт но луиз кадь. Сомында иворъёс пушказы выйыто. Котьку атай шуэ вал: компьютер ужан понна гинэ луыны кулэ, нош ми шудыса пукиськом.

Кык ар ортчиз ни кадь, нош монэ нокин утчамтэ. Гожтэтъёс ӧжыт. Классысьтым нылаш гожтэм. Ӧй дисьты усьтыны. Пытсай но мукетъёс доры лыктӥ. Быдэс дуннеысь иворъёсты верало вал, берло дыре ожмаськонъёсын сэрен. ваньзы пе шузимиллям ни. Мон понна сыӵе арбериос тунсыко ӧвӧл. Потӥ ураме но инкуазьлэсь мылкыд ик бурдъяськыны кутскиз кадь Возь вылэ пукси гинэ, пельпум вылам куака васькиз.

- Кытын вал тон? Кемалась ӧм адӟиське ни. – шуи мон солы шумпотыса.

Куака ӧз вазь. Бадӟым бурдъёсын лопыръяса лобӟыса кошкиз. Возь вылэ кисьпу туй куштыса кельтӥз. Дораз мынӥ но, номыр ӧй вал ни. Табере мон валай ваньзэ. Берытскыса учкисько: корка вужмем, эшъёс кыӵе ке горд ву юо нумырӟем печениосын. Доразы оломар вераса пересь пуке. Черекъяны кутски, нош соос номыр уг кыло. Азям пожаськем вулэсь кадь борддор сылэ. Чыжасько, мыжгасько, тылэз сэрпаллясько – номыр уг юрты. Оломар асме сэрпалтыса куштӥз. Мынӥсько потэм ӧс доры ик. Быдэсак сьӧдэктэм, кутэтэз гинэ кылем на. Кышкаса каллен гинэ усьтӥсько со ӧсэз. Шуак пыд йылысьтым уськыто уллёен лобась шыръёс. Адӟисько пумитын: коркалэсь пулъёс гинэ кылемын ни, эшъёс пуко ӝуам ӝӧк сьӧрын. Усьтӥсько нош одӥг ӧсэз, отысь ӝуась ымныр бызьыса потэ. Кышкаменым нош ик пыд йылысьтым усисько. Ваньмыз пеймыт. Черекъясько эшъёсылы, нокин уг вазьылы. Мар ке но монэ шлач! гинэ шуккыса уськытэ. Ӝутскисько, киям боды, мынӥсько азьлань. Кыӵе ке но пӧйшур лобе шорам, шуккисько ымныраз бодыен. Дорын сылӥсь писпу но солы пумит нюръяськыны кутскиз. Пограсько. Ваньмыз ыше. Эшъёс сыло дорам. Мар вал со шуыса юаллясько. Мон долкаса, номыр вераны быгатытэк кыллисько. Корка интыын номыр ӧй вал ни.

- Мар вал со? – нош ик юа мынэсьтым Ӟӧльгыри.

Рюкзакысьтым вуме поттыса вожомыса юисько.

- Эшъёс!Корка ум бертэ-а асьмеос?Ум азьланьтэ меда дышетсконмес?

- Тынад дунне вылтӥ ветлонэд, ачид тод.

Берлань бертоно кариським. Дась ӧвӧл на мон сыӵе шуг-секытъёсын пумиськыны. Бӧрысь та сюрес вылэ берытском на, вождэ эн вай, куака. Инмын кӧня ке лобаз но ышиз.

Одӥг иськемез ортчем бере, излэсь сюрес вылэ потӥм. Азьланын кин ке но пумитэ бызе вал.

- Нылаш – шуи мон.

- Малы озьы малпаськод? – юаз Ӟичы.

- Нылъёс гинэ озьы киоссэ сэрпалляса бызьыло. Дасяське, кин тодэ марлы бызе со.

Ӟичы тыл дасяз, Данейко кияз тӧл пери возе. Ачим битаез рюкзакысьтым поттыны дасяй.

Ми пала вуыкуз нылаш черекъяны кутскиз:

- Кошке! Мон сьӧры бадӟым пӧйшуръёс бызё!

Мынам киям канжаськыса усиз. Нунал ӝогак берытскиз уйлы. Ми доры табере горд ӝуась синъёсын пуныос бызё вал. Поттӥ битаме, дасяськи жугиськыны, кышкасько, пыдъёс куалекъяло…

- Сайка…ну, султы ни – кылӥське Данейколэн куараез.

Усьтӥсько синэз. Дорам эшъёсы сыло. Шуген кытын луэмме валаны тыршисько.

- Мар луиз? – юасько соослэсь

- Тон пыр нылаш бызьыса кошкиз но буслы берытскиз.

Нош ик азьланьтӥм сюресмес. Ӝытлы корка бертыса вуим ни. Ваньзылэн юаннъёссылы валэктон сётыны кужыммы ӧй вал ни.

XVI

Ӵуказеяз, дышетскем бере Данейко доры мынӥ. Котьку мылкыдыз умой вал солэн, котьку серекъя вал. Зэмзэ вераса, сыӵе улонлы шумпотэмез монэ туж акыльтэ вал.



- Марлы тон котьку шумпотӥськод? – юасько мон солэсь.

- Котьку мӧзмыт пе ветлод-а? Тросэз сотэк но нырзэс ошыса ветло. Сыӵе дыръя кытчы ке кыдёке-кыдёке кошкем потэ. Нош татчы сюрем бере, котькудӥз нокытчы кошконтэм кылзэ сётэ… Тон мӧзмиськод-а марлэсь ке?

- О-о, вай-файлэсь…

- Вуоно аре сыӵе арбериосын вырыны дышетском ни.

- Татын вань-а мар-а со?

- Вань кар пушкын. Отчы тужгес устооссэ гинэ келяло.

- Тон кытысь тоськод?

- Мыным агае вераз вал. Огпол кошкиз но ӧз ни берытскы. Келязы ке монэ отчы, одно ик шедьто сое. – трос огазе сылӥсь писпуос шоры возьматӥз.

XVII

Нош ар ортчем бере, тылэн но, вуэн но быгатыса ужаны дышетски. Тужгес но устоосыз пӧлысь каре мыныны милемыз Данейкоен бырйизы. Пыдын мынонэз тодэм бере, ӧжытак мылкыд куашказ. Сюрес вылэ потыны сиён люкам.



Мынӥм туж кема. Кыддыръя дугдылӥм пӧйшураны но чорыг кутыны.

Карлэн дураз барак сылэ вал. Отчы пырим но кык пиос милемыз комнатае интыязы. Татчы пырась адямиос койка улэ асьсэлэсь нимтулъёссэс гожъяса кельтылӥллям вылэм. Огаз гожтэмын вал: «Мусо сузэре! Тае али адӟиськод ке, тон умой дышетскемед! Одӥг правилоез гинэ котьку тод – эн сюры!!! Тынад агаед Кион». Возьматӥ тае Данейколалы но солэн ӝожомыса, синкылиоссэ воземез ӧз луы ни.

Ми ум тодӥське вал марлы милемыз татчы каре лэзизы. Ял карем бере милемыз люказы. Табере пе милемлы нош ик дышетсконо. Тодоно лушкаськыны: карточкаосты усьтыны, янчикъёсты басьтылыны но пегӟыны. Толэзь куспын ваньмызлы дышетским но потим кар пушкы ужаны.

Вань лушкам коньдон кошке гурт калыклы арбериослы. Котькуд нунал кыкетӥ пияш ваньзэ люкаса гуртэ нуэ вал.

Быдэс ар ортчиз, ыштӥм кык пияшез, кудъёсыз мукетъёслэсь тросгес выризы лушкаськыны. Асьмелэсь нормамес быдэстӥм, табере милям интые выльёсыз лыктозы, нош милемлы пыдэн берлань бертоно. Урамын гужем куазь, тылобурдоос чирдо. Вунэтӥмы вал кадь ини мар со сыӵе инкузьлы шумпотон. Нош мынам адӟеме потэ вал на быръем егитъёсты, кудъёсыз милесьтым ик сюресмес ортчозы.

XVIII


Туннэ дас витетӥ август. Данекоен ӵош пӧйшураны потӥмы. Дасяськисько солы аслэсьтым сюлэмме усьтыны. Кышкасько.

Кӧня ке тыл кужым басьтыса писпуысь коньыез уськытӥ. Со усиз. Мукет коньыос доры куштыса Данейко доры султӥ.

- Мынам тыныд вераме потэ…- кутски мон кепыраса.

- Кулэ ӧвӧл номыр вераны, мон сотэк тосько – шуиз но ымдуре чупаз.

Мон валатэк ик кыли, со кужмогес ӟыгырскыны кутскиз. Ас дорысьтым донгыса лэзи.

- Дугды, кулэзэ ӧй вера на ук!

Кытын ке но машина куараос кылӥськыны кутскизы.

- Мар со? – паймиз Данейко.

- Уг тоськы, ойдо учком!

Трос адямиос отчы люкаськемын вал ни. Танкъёсын но мукет техникаосын лыкто зэмос ожгарчиос. Кинэ ке утчам выллем кален гинэ котькуд сажемзэ мертаса лыкто.

- Мар ыштизы соос татын?

- Отын мынам агае! – бызьыны турттэ вал ни, кутыса вуттӥ.- Лэзь монэ!

- Шып ул – шыпыт гинэ верай солы.

- Учкы со шоры, кулэм кадь со, ымнырыз но излэсь кадь.

Кион БТР вылын пуксьыса мынэ вал.

- Кошким. Гуртысьёслы ваньзылы вераса потоно.

***

Быдэс дуннеысь адямиос пересьёслэсь кылем тодон-валанзэс ыштыны кутскем бере, удмурт калык но бырыны шедиз. Ведонъёслэн, вӧсясьёслэн но пӧртэм валантэм пӧйшуръёслэн кужымзы но лябӟиз. Цивилизация вамыш бӧрсьы вамыш удмуртъёслэсь лулчеберетсэ ӵушыны кутскиз.



Аслэсьтыз кышнозэ но пизэ кутыса, Гондыр нюлэске улыны кошке. Малпа отын ведонъёсын огин люканы. Ваньмызлы лыктыны косыса, гожтэтъёс келя. Озьы ваньзы ог-огзылы гожтэтъёс келяны кутско. Собере кӧня ке толэзь соос чиганъёсын ӵош уло но лушкаськонлы дышетско. Утчало нюлэс пушкын инты но ваньзэ вашкала выллем лэсьтыса улыны кутско. Выль ведонъёслэн семняоссы лыкто. Куинь ар куспын куинь адямилэсь сюрсэз люкаське, пиналъёсты вань тодон-валанъёслы дышетыны кутско. Гондырлэн Кион нимо пиез ваньмызлэсь усто луэ. Соин ӵош кык пияшез келяло каре арбериос лушканы. Гондыр валэктӥз соослы кытын улэ солэн эшез, кудӥз возьматоз соослы лушкаськон интыосты. Озьы ужбергатыса ортче куинь ар. Гондырлэн вордске Данейко нимо нылыз. Данейколэн агаез, Кион потыны малпаз та лушкаськон система пушкысь. Барак басьтӥзы но асьсэос вылэ гинэ ужаны кутскизы. Огпол озьы ужакузы сое куто армие кошкись муртлэн документъёсыныз но кыдёкысь музъемъёсы келяло. Вань пагонъёссэ кесяло но уг лэзё дораз гожтэт келяны. Туж кышкыт ожмаськон интыосы со сюре. Олокыӵе но кӧшкемыт арбериос отын ортчо. Огшоры улӥсь калыкез ыбыло, асьсэос ожгарчиос ошиськыло но ыбисько. Ваньзэ сое адӟем бераз берлань каре ужаны келяло. Одӥг нунал приказ вуэ нюлэске мыныны, отын пе пумит мынӥсьёслэн ожгарчиоссы люкаськемын. Лыктыса со валаны кутске – та интыосын со будӥз но дышетскиз. Тани со учке кызьы егит нылашен пияшъёс бызьыса кошко.

***


- Ӝоггес, бизим! – черекъясько Данейколалы.

Кышкаменыз со кытчы бызьыны но уг вала. Ӝоген гурт доры вуэм бере, мырдэм шокаса, пересьёслы кутским ожгарчиос сярысен валэктыны.

- Мар тӥ вераськод? Номыр валантэм. Кутске выльысен – шуизогез пересь.

- Отын…со… отын танкъёс – шуи мон мырдэм шокаса.

- Кыӵе танкъёс татын, нюлэскын? Дышетскыса жадиды-а мар-а?

Мукетъёс шоры учкыса сереме уськытыны выре вал но, нокин но солэн шораз ӧз учкы. Соин ик выль юан сётӥз.

-Кытын адӟиды?

- Отын, куйы дорын.

- Кышкытлык вань ке, ваньзылы вералэ. Косэ гуртысь кошкыны. Чакласьёслы косэ ожмаськонлы дасяськыны. Эшъёстэ басьты но лыктэмзы сярысь вераса улод.

Мон чакласьёс доры бызи нош Ӟӧльгыриез гурт калык доры келязы.

- Тӥледыз кунгожез возьманы косӥзы – шуи мон чакласьёслы.

- Марлэсь? – зок куараен юаз азьветлӥсьсы.

- Гуртэ пырисьёслэсь. Милемыз но асьтэс пушкы пыртэ.

- Озьы бере, эшъёстэ кут но лыктэмзы сярысь вераса улод.

- Ярам.

Бызи эшъёс доры но вакчияк ужрад ласянь валэктӥ. Ваньмы ӵош бызьыку ми доры Данейко но лыктӥз.



- Кытчы тон? – юай солэсь.

- Тӥледын!

- Гуртысьёслы верад-а бон?

- Верай. Люкасько ни соос.

- Эн ветлы ми сьӧры, кышкыт – черектӥ мон.

- Мыно – лякыт гинэ вазиз со.

- Ачид тод. Мон тыныд верай.

Ми Ӟучыен штабзы доры матэгес лыктӥм. Палатка бордазы пичи гинэ пасез вань вал, со пыр офицеръёс шоры учкыны кутским. Кызьы мон валай, соос сыло вал ожмаськонлэсь планзэ эсекрыса.

- Ми мыном паллянысен – шуиз пересез.

- Мукет потон сюрессы вань дыр. Лэзе нырысь разведчикъёсты. – аслэсьтыз кылзэ ватсаз гражданской дисен сылӥсез

- Сылэ! Кидэс вылэ! – кылиськиз палэнысен

Паллянэ учки но, отын Ӟичы кизэ жутэ вал ни. Зӥбизы тревогаез, ваньзы котырын люкаськыны кутскизы.

Данейко тылэн шар огезлы ожчилы ымныраз келяз. Мукетыз берытскиз гинэ – йӧэн кынтӥ. Вань кужмысь бызьыны кутским. Берлань вуэм бере планзы сярысь ваньзэ чакласькисьёслы валэктӥм.

Дас ӵошен чакласькисьёс паллян фланге кошкизы, кылемез бур пала, нош ми отчы ик азязы сылыны кылим.

Ми музъем вылын пуким, нош Ӟӧльгыри писпу вылын. Дырез юнме ортчытонтэм шалаш лэсьтыны малпам. Ӝыныяз гинэ вуттӥм но ужмес, ожгарчиос матэ ик лыктыса, ми вылэ газ лэзизы.

- Эн шокалэ! Бызим! – черекти мон.

Ӟичы шокчыса вуттэм вал ни, кужымтэк пограз. Ачиз пичи ке но секыт вал сое ӝутыса нуыны. Кыдёке нуыса ми сое ӧм вуттэ, отчы ик писпу выжые куаръёсын шобыртыса кельтӥм. Асьмеос азьлане бызим. Шуак Ӟӧльгыри олокытчы ышиз.

- Данейко! Кытын тон? – дугдӥ но сое отьыны кутски.

Шӧдтэк шорысь монэ кутӥзы но кытчы ке кыскыса пыртӥзы. Шоканэ быре вал ни газ понна, соин ӝогак противогаз сётӥзы.

- Кытын тӥлядъёс? Эн кышкалэ. Мон Куака.

Номыр валатэк солэн пумитаз пукиськом. Матын ик Ӟичы изьыса кылле.

- Бур палан но паллян палан соос – шуи мон.

- Бер ни иське, кошким татысь.

- Кызьы кельтод соосыз? – пайми мон.

- Бер ни шуисько. Соослы номырен уд юрты ни. Кошким татысь

- Уг! – кеськыса бызи чакласькисьёс доры.

- Кытчы? Берлань!

- Мон со сьӧры – шуиз Ӟӧльгыри но мон сьӧры бызиз.

- Дугдэ! Шузиос! Асьтэды гинэ быдтоды!

Гуртлэсь номыр уыльымтэ вал ни. Вань чакласькисьёс музъем вылын изё вал. Азьветлисьсэс корт четлык пушкы пыртӥллям. Со тӥяны выре корт клетказэ, тырше сое тылэн жуатыны, номыр уг пӧрмы. Ожчиос жуго чакласькисез бодыосын,электрошокеръёсын: соослэн но та азьветлӥсьлэсь кужымзэ быдтэмзы уг луы.

Мар кароно? Мар кароно? Нокызьы валэктон йыре уг лыкты.

- Мар кароно? – шара верай мон.

Данейко шып сылэ.

Собере машина лыктыса вуиз. Отысь сьӧд костюмен адями потӥз но четлык пала вамыштӥз. Кисыысьтыз пистолетсэ поттӥз.

- Эн! – черектӥ мон.

Ваньзы берытскизы но монэ утчаны бызизы. Ми шур пала пегӟим. Ожчиос сьӧрамы бызьыса вуизы но асьсэлэсь янгышамзэс валатэк кылизы.

Мон соку ик вуэз ӝутыса соосты котыртӥ, нош Ӟӧльгыри со вуэз кынтӥз. Ог ныьыль час пала соос отысь потыны уз быгатэ.

Табере берлань берытсконо ни вал, чакласькисез мозмытыны. Берытскыса гинэ вуим но, сьӧд костюмен адямизы куасалтӥз Ӟӧльгыриез но солы чыртыяз шприцен бышкалтӥз. Соку ик пистолетэныз мон пала кариз.

- Сыл, кытын сылӥськод! – шуиз мыным.- Берытскы. Кушты медальондэ но мын шонер. Эн, кышка. Нылашед ӝоген сайкалоз.

Мон мынӥсько но малпаськисько – кызьы, мар кароно бон табере? Вань кужым вал солэн кияз.

- Ми кемалась тӥ кадьёсты кутылыны выриськом, тодӥськом медальонэн гинэ кужмоесь луиськоды.

- Малы мыным дырдэ быдтӥськод? Виы монэ,лэзь Ӟӧльгыриез.

- Уг быгатӥськы. Мыным косӥзы тӥледыз улэпкын вайыны.

- Кин? – юай мон, машина доры вуыку.

- Сыл! – писпуос пӧлысь потыса черектӥз Куака.

- Вольно, тӥ быдэстӥды приказдэс, берлань бертыны быгатӥськоды – шуиз со Куакалы.

- Мон табере ожчи ӧвӧл ни – кеськиз со вожзэ поттыса.

- Ӟичы кут сое!

Олокытысь гинэ Ӟичы потӥз. Сьӧд адямилы тыбыраз шукки но, палэнэ лобыса кошки. Солы номыр ӧз луы. Ӟичы со вылэ тылъёсты келя, но нокызьы уг етты. Киям ӧвӧл ни медальонэ, кужым но ӧвӧл султыны. Солэн гадь вылаз мар ке чиля…

- Со мынам медальонэ! – шара черектӥсько.

Уг луы султэме, табере со убир киын вань кужым. Каллен пыд йылэ султыны вырисько.

Куиньнамы солы пумит нюръяськиськом. Толэн зӥбе куака, Ӟичы тылэн ӝуатыны выре, нош мон автоматэн ыбылӥсько. Нокинлэн сое быдтэмез уг луы, милемыз сэрпалля гинэ. Патронъёс бырем бере, ӝуатыны бызи вал пумитаз, нош со монэ палэнэ лобӟытӥз.

- Медальонзэ басьтоно! – черектӥз Куака.

Ӟичы нош ик шуккыны вырыку, мон сьӧрысен ишкалтӥ медальонзэ, Куака мечен солэсь йырзэ вандӥз.

Чакласькисьёсты мозмытим. Шур вылысь ожчиосты но лэзим. Ачим соослы сётски.

Малы сётски? Отын быдэ вуи ке но, мынам карын потэ вал улэм. Пытсэт сьӧры келязы ке но быгато дыр мон ортчыны вань секытлыкез. Мынам уг поты нюлэскын улэме, потэ воштӥськеме, адями луэме. Мон малпасько, цивилизация лэсьтэ адямиез. Али монэ нуо каре, уг тодӥськы мар луоз азьланяз. Та берпумети гожъямъёсы. Шуо, гожтэмын пе, лул кыле, Кубыз сярысь мадёсын кадь. Нош медальонме нокин медаз шедьты шуыса, туж пыдло ватыса кельтӥ.

XIX

Доминик пыриз юалляськон кабинетэ, киосысьтыз наручникъёсты куштизы. Синучконлы пумит пуксиз. Киноосын котьку возьмато – со укно сьӧрын учкисез вань.



Следователь пыриз но кагазъёсын папкказэ ӝӧк вылэ куштӥз.

- Малы сётскид?

Мур малпаськись ымнырен адями вал со. Шӧдиське вал, котькуд кылзэ ас пушказ трос пол малпаса вера, кин ке но дыр со шоры учкыса, ужамзэ эскере.

- Кытын кыкетӥ алама Полицейскийды? – серекъяса юаз Доминик.

- Трос кино адӟемед, пияш! Кытын медальонэд? Верад ке, соку ик лэзём. Дышетскыны пыртом. Тынад визьмыныд, капчиен сое быдэстод. Выль улон кутскоз.

- Чебер кырӟаськод, но гуред тынад мукет. Мыным кулэ главнойды, соин гинэ верасько.

- Луоз. Юанлы гинэ али валэктон сёт

- Уг


- Ярам.

Следователь потса кошкиз. Пыризы солдатъёс, киоссэ кортназы. Ӧс усьтӥськиз но питранъёсын кортлэсь ящик пыртӥзы.

- Мар карыны тыршиськоды тӥ монэн?

Сое понӥзы со корт коробе но трос тунгонъёсын пытсазы.

Пыриз пересь майор. Доминик адӟиз вал сое, куке палатка дорын гуртэз басьтон планэз соос эскеро вал. Ымнырыз кӧсэктэм, выжыкылъёсысь адямилэн кадь.

- Кытын медальон?

- Мар тӥледын? Кулонды вуэм ни ук.

- Кин тыныд право сётиз монэн сыӵе вераськыны? Соиз но шонер, со мыным висёнэз зибыны кулэ.

- Со понна мынэсьтым атай-анайме быдтӥд но гуртэз быдтыны малпад?

- Умой уж понна котьку яра коня ке марымез быдтыны. Тӥ калык понна номыр умойзэ ӧд лэсьтэ. Тазьы армилы но кужым луысалды. Азьланяз но умой улысалмы…

- Лыктыса уг луы вал-а юамды?

Следователь электрошокерен пыриз.

- Кызьы тон сое адӟиськод? Ӟечбуресь, милям армие пырыны уд малпаське-а? Ми тиледыз сюдом, дӥсятом, только пичи куронмы вань – кулоно луоз одӥг ужрад понна. Тӥ лушкаськонъёсыныды кунмылы воксё акыльтиды. Чиганъёс кадь, шакшы тӥ огшоры калык пушкын.

- Ми эрико! – черектӥз вожзэ поттыса, Домга.

- Паймымон, дневниказ мукет сямен гожъяз вал. – шуиз следователь.

Корт ящик ӟырданы кутскиз.

- Медальонзэ эскериды-а? – юаз мӧйы пиосмурт.

- Эскерим – шуиз следователь.

- Металлодетекторен?

- Ӧм


- Мае витиськоды? Ньылэм дыр со сое!

Следователь электрошокерен малпа вал ни Доминиклы сётыны, шӧдтэк шорысь борддор борды пезьдиз. Со дыре ик пияш кортэз тӥяса вырӟиз со коробысь. Майор кышкаса, мар карыны ик паймыса сылэ. Ожчиос кужмо куто сое.

- Малы тӥ кутӥськоды монэ? Кутэ со пияшез!

- Умойгес лыдӟоно вал мынэсьтым дневникез. ОТын гожтэмын вал ук, одӥгаз мон гожъяй шонерзэ, нош мукетаз пӧяськыса, соиз – атай-анайлы.

Вай ай мыным сое Ӟичы.- одӥг солдатлы вера, но кагазъёсын со пересьлы ымныраз сэрпалтэ. – Таин мынам веранэ быроз.

Пересь майорэз потто ураме. Палэнын ыбем куара кылӥське. Следователь сайка но адӟе котькытын кагазъёс сэрпаллямын. Выж вылын книга кылле, вылаз гожтэмын «МЫНАМ УЛОНЭ».

XX

Мон потӥ но мукет ӧсэ кадь. Татын ваньмыз экран вылын, котькудаз адямиослэн улонзы.



- Кызьы тон татчы пырид? – юа мынэсьтым экран сьӧрын пукись адями.

-Мон кызьы? Кытын?

- Тон Доминик?

-О-о.


- Ми тонэ ыштӥм вал, табере ачид лыктид.

- И мар?


- Тынэсьтыд герой карыны малпаськом вал но, мар ке ӧз пӧрмы, медальон-а мар-а меда люкетиз.

- Мар та ваньмыз?

- Тон пересь поколенилэн проектэз. Ми пересь поколение. Ми тӥлесьтыд улондэс гожъяськом. Ваньмыз кадь ик Инмарлы оскиськом вал. Собере кутскиз кибер-революция, ваньзы пӧйшур дуннелэсь кошкыны кутскизы. Ресурсъёс ӧй вал, соин кылдытыны кутскизы выль адямиосты, таяз но мукет планетаосын. Пересь поколение шудонъёс но кылдытъяны кутскиз, кытын тон валтись герой. Ваньмыз дуннеед вал виртуальной, асьмеос али тани вераськиськом, со гинэ зэмос. Туж трос планетаос, тон кадь адямиос но туж трос. Нош тон кызьы ке но потид татчы, соиз мон понна валантэм.

- Так, вань проблемаос мынам йырын гинэ?

- Озьы ик вань

- Куакаос мар со?

- Пудо-животъёс, ведонъёс, черкъёс – ваньзы кивалто гинэ тиледын.

- Нош кышкыт веранъёс?

- Коть кудшудонын луо глюкъёс.

- Ми кадь ик Инмар луэмед потэ ке, быгато карыны.

- Вие – шуи мон мылкыдтэк. – Ошоры адями кадь ик улэм потэ, инкуазьлэн люкетэз кадь ик.

Ӧсэз вӧлак усьтӥ но ураме потӥ. Мур шокчи но пальпотыса, азьланезлы сюлмаськытэк, вамыштӥ азьлань.



~ ~


Коьрта
Контакты

    Главная страница


Мынам нимы Домга

Скачать 347.54 Kb.